Ish-kryeministri Sali Berisha ka denoncuar nga selia e PD-së, aferën e inceneratorëve duke akuzuar kryeministrin Edi Rama se është koka e këtij skandali. Sipas Berishës, për ndërtimin e inceneratorëve të Elbasanit dhe Fierit, Ministria e Mjedisit nuk kishte para.
Berisha tha se Rama ka përdorur Fondin e Këshillit të Ministrave për t’i kaluar dhjetëra milionë euro kësaj ministrie. Ish-kryeministri shton se kjo është në kundërshtim me ligjin, pasi fondi përdoret vetëm në raste emergjencash ose fatkeqësish natyrore.
“Edi Rama ka firmosur në mënyrën më të paligjshme, kontratën bazuar në procedurën antiligjore të negociatave të mbyllura. Edi Rama, në shkelje flagrante të ligjit dhe barazisë së tenderave, ka firmosur, kontratën e një kompanie e cila kishte zero eksperiencë në fushën e plehrave. Edi Rama është përgjegjësi numër një i vjedhjes mostruoze të shqiptarëve nën aferën e djegësave. Për djegësin e Elbasanit dhe të Fierit, Ministria e Mjedisit që u përdor për ekzekutimin e kësaj vjedhje, kishte në buxhetin e saj zero lekë. Paratë e djegësave, u morën nga Fondi i Këshillit të Ministrave për urgjencën. Fond që në përputhje me ligjin e vendit, përdoret vetëm për fatkeqësi natyrore dhe gjendje urgjente. Edi Rama, këtë fond e përdori për të përvetësuar, bashkë me zyrtarët e tij, dhjetëra e dhjetëra milionë euro. Me urdhër të tij, ai nga fondi i emergjencës së Këshillit të Ministrave, kaloi dhjetëra milionë euro në buxhetin e Ministrisë së Mjedisit për vjedhjen me inceneratorët. Edi Rama është përgjegjës direkt, sepse ai firmosi kontratën me procedurë të mbyllur në një kohë kur enti zyrtar i Prokurimeve Publike, ajo që quhet APP, me shkresë kishte denoncuar më përpara si të paligjshme për prokurim, negociatat e mbyllura. Kurrë një kryeministër, përveçse atij që vendos të vjedhë para me valixhe, nuk mund të firmoste në një procedurë të tillë. Edi Rama, është koka e kësaj afere të tmerrshme”, tha Berisha.
Discussion about this post