Për herë të parë pas luftës dhe pas marrëveshjes së nënshkruar në Stamboll me Rusinë, Ukraina ka nisur sot eksportin e grurit. Ukraina ka konfirmuar se ka filluar puna në tre portet e vendit që kanë dalje në Detin e Zi për rifillimin e eksporteve të grurit.
Por çfarë do ndodhë me Shqipërinë? Ende nuk dihet nëse pas këtij lajmi, që do të ndikojë në uljen e çmimit të grurit dhe produkteve të saj në tregjet botërore, Bordi i Transparencës do të reagojë.
Kujtojmë që çmimi i bukës masive në Shqipëri, u rrit nga 80 lekë që ishte para konfliktit në Ukrainë në 120 lekë, një çmim që vazhdon dhe sot. Pritet një ndërhyrje e Bordit të Transparencës që qytetarët të ndihen të lehtësuar nga çmimet e larta të produkteve të shportës.
“Pas nënshkrimit të marrëveshjes nga Rusia për zhbllokimin të porteve të Ukrainës për eksportin e grurit, puna ka rifilluar në portet në Odesa, Chornomorsk dhe Pivdeny”, theksohet në një njoftim në shpërndarë në rrjetet sociale nga marina ukrainase.
Nga ana tjetër, ministri turk i Mbrojtjes, Hulusi Akar, njoftoi se në Stamboll është krijuar një grup pune që do të mbikëqyrë eksportin e drithërave ukrainase, pas marrëveshjes të cilësuar historike që u arrit edhe me pjesëmarrjen e OKB-së.
Rusia dhe Ukraina nënshkruan marrëveshjen, të ndërmjetësuar nga Ankaraja dhe Kombet e Bashkuara, të premten e kaluar për të rihapur eksportet e grurit dhe plehrave që janë bllokuar nga lufta duke lehtësuar kështu një krizë ndërkombëtare ushqimore.
Sipas ministrit turk grupi prej 20 personash, punonjës nga Ukraina, Rusia, Turqia dhe Kombet e Bashkuara “do të punojnë krah për krah për të siguruar që eksportet të kryhen sipas marrëveshjes”.
Ndërkohë kryeministri polak tha se “nuk mund t’i besohet Rusisë se do të respektojë këtë marrëveshje”, pasi sipas tij një ditë pas firmosjes Moska sulmoi me raketa portin e Odesës në Ukrainë.
OKB-ja dhe Turqia shpresojnë se nga Ukraina do të eksportohet më shumë se 25 milion ton grurë. OKB-ja, Ukraina dhe Rusia kanë thënë të gjithë se presin që eksportet të fillojnë brenda pak ditësh.
Por zëvendësministri i Jashtëm rus Andrei Rudenko tha të mërkurën se marrëveshja mund të prishet nëse pengesat ndaj eksporteve bujqësore të Rusisë nuk hiqen menjëherë.
Dërgesat e Ukrainës përmes detit kanë ngecur që nga muaji shkurt, duke shkaktuar një rritje të mprehtë të çmimeve globale për drithërat, vajrat e gatimit, karburantet dhe plehrat.
Moska ka mohuar përgjegjësinë për krizën ushqimore, duke fajësuar sanksionet perëndimore për ngadalësimin e eksporteve./
Discussion about this post