Qyteti i Himarës u trondit pasditen e sotme nga një ngjarje e rëndë ku humbi jetën një vajzë e mitur. Vetëm 2 kilometra largë qendrës, tek plazhi i Potamit, helikat e fuqishme të një skafi i morën jetën 7-vjeçares dhe bënë që pushuesit e pranishëm të shihnin llahtar me sy. Skafi drejtohej nga Arjan Tase, ish-shef komisariatit në policinë e Himarës. Ky i fundit ishte arrestuar dy vite më parë për shpërdorim detyre, pasi kishte lejuar kultivimin e kanabisit në Vlorë.
Në momentin që ka ndodhur ngjarja, drejtuesi i gomones, efektiv i policisë ishte afruar në breg për të marrë familjen e tij dhe për të vijuar rrugën. Pasi ka ngjitur familjarët e tij mbi skaf, ai ka nisur të lëvizë drejt detit, dhe pikërisht në këtë moment i mori jetën 7-vjeçares. Kjo e fundit, e lindur në Britani, kishte ardhur me familjen me origjinë tropojane për pushime.
Kur ndodhi ngjarja e rëndë, autori nuk ka bërë asnjë tentativë për t’u larguar por ka qëndruar në skaf në pritje të uniformave blu. Në momentin që sulmohej me fjalë nga pushuesit, me të cilët ai pati edhe një debat, është dëgjuar të thotë: “Nuk doja”.
Nga dëshmitarët mësohet që në vendin ku ka ndodhur ngjarja nuk ka pasur një korridor të përcaktuar për të hyrë apo dalë mjetet lundruese. Atij i është bërë thirrje që të tregojë kujdes kur lëvizte mjetin pasi kishte fëmijë në breg, ndërsa në video mund të shohim edhe reagime jo pozitive nga drejtuesi i gomones. Sipas dëshmitarëve, Arjan Tase është konfliktuar me plazhistë të tjerë dhe i ka bërtitur në drejtim të prindërve të viktimës. Pasi e ka goditur nuk ka denjuar të zbresë dhe të shohë fëmijën, por ka qëndruar në gomone së bashku me bashkëshorten e tij.
Discussion about this post