Këngëtarja me famë botërore me origjinë shqiptare Dua Lipa e cila nuk ndalet me arritjet e saja, do të nderohet ditën e sotme dhe nga Posta e Kosovës. Kjo sepse do promovohet pulla postare Dua Lipa.
Në ceremoni do të jetë vetë Dua e cila ndodhet në Kosovë ku po organizon festivalin ‘Sunny Hill’ ku yjet botërorë dhe shqiptarë janë bërë bashkë në Prishtinë.
Lajmin e ka bërë të ditur shefi i Administratës dhe Protokollit dhe kryesuesi i komisionit për aprovimin e pullave postare, Kamber Demaku.
Kujtojmë që Dua Lipa është shpallur Ambasadore Nderi e Republikës së Kosovës. Lajmin e ka bërë të ditur, presidentja e Kosovës, Vjosa Osmani, e cila ka ndarë në Facebook disa foto nga momenti i rëndësishëm.
“Sot, Dua Lipës, i ndava titullin Ambasadore Nderi e Republikës së Kosovës, sepse ajo vazhdon ta nderojë vendin tonë në çdo hap e çdo paraqitje. E falënderova, në emër të të gjithë qytetarëve të Republikës së Kosovës për gjithçka që ka bërë dhe po bënë që zëri ynë të dëgjohet kudo në botë”, shkroi Osmani në Facebook.
Presidentja theksoi se ajo po e shfrytëzon zërin dhe talentin e saj të jashtëzakonshëm, jo vetëm për t’i ofruar botës këngë që lënë gjurmë, por edhe për ta prezantuar imazhin më të mirë të Kosovës kudo në botë.
Discussion about this post