Presidenti Emmanuel Macron ka pritur këtë të mërkurë në Paris, kryeministrin e Kosovës Albin Kurti.
Gjatë fjalës së tij presidenti francez shprehu mbështetjen për zhvillimet në Kosovë.
Ndërsa u ndal tek dialogu Kosovë-Serbi, Macron tha se të dy vendet duhet të gjejnë gjuhën e përbashkët, të gjejnë kompromisin për të ardhmen e Kosovës.
“Franca ka qenë vendi i parë që e ka njohur Kosovën. Që nga ajo kohë Franca ka dhënë mbështetje për zhvillimin ekonomik dhe për të arritur konsolidimin për kulturën si edhe sigurinë. Dje kemi pasur takim me ministrin e punëve të Brendshme. Unioni Europian ka një projekt që promovon shtetin e së drejtës dhe qeverisë.
Gjithmonë do të keni mbështetjen tonë. Unë ftoj Kosovë dhe Serbisë të gjejnë kompromisin për t’u kthyer tek e ardhmja e Kosovës, unë e di se ju jeni i bindur për këtë”, u shpreh presidenti francez.
Kjo është vizita e parë e Albin Kurtit në Paris pas marrjes së detyrës si kryeministër.
Kujtojmë se një ditë më parë, Kurti priti në një takim këshilltarin politik për Ballkanin e Presidentit Macron, Isabelle Dumont dhe ambasadoren Franceze në Kosovë, Marie-Christine Butel.
Temat e takimit ishin zhvillimet politike në Kosovë, rajon dhe botë, qeverisja e mirë në Kosovë, integrimi evropian, si dhe bashkëpunimi dypalësh dhe thellimi i marrëdhënieve ndërmjet Kosovës dhe Francës.
