Dy persona janë arrestuar nga policia e Lezhës ditën e sotme pasi dyshohet se ishin duke u përgatitur për të kryer një krim. Një prej të arrestuarve është shtetasi Nikoll Sherrniku, i cili ishte në arrest shtëpie pasi është i implikuar në vrasjen e ish-efektivit të policisë, Xhulio Prela.
Operacioni i policisë së Lezhës është zhvilluar në Shëngjin, ku uniformat blu pasi kanë pikasur një makinë tip “Toyota” të parkuar pranë një pallati, kanë ndërhyrë për të arrestuar shtetasit që ishin brenda.
Në momentin që kanë parë policinë, 28-vjeçari Nikoll Sherrniku dhe 34-vjeçarja Flutura Berisha kanë dalë nga automjeti dhe tentuan të largohen. Shtetasja Berisha gjatë tentativës për t’u larguar, fshehu dhe një armë zjarri tip kallashnikov. Por të dy ata u ndaluan dhe u arrestuan nga policia.
Gjatë kontrolleve të ushtruara në automjetin e blinduar ku ishin dy të arrestuarit, policia gjeti dhe sekuestroi edhe 2 krehëra me fishekë që i përkisnin armës tip kallashnikov që Berisha tentoi ta fshihte.
Ndërsa në çantën e dorës së 34-vjeçares, u gjetën dhe 2 radio marrëse si ato të policisë. Në makinë me dy personat ishte dhe një fëmijë i mitur 15 vjeç.
Discussion about this post