Pas artikullit “Historiku i vajzave kosovare me ëndërra e pasione, të cilat i realizuan me shumë mund e sakrificë, tregojnë për personin e parë që i përkrahu pas shumë refuzimeve”, mësuam se sa e rëndësishme ka qenë pjesëmarrja e tyre në kombëtaren e Shqipërisë. Prandaj “Presheva Jonë” e pa si të patjetërsueshme nevojën që të bisedojmë me presidentin e Federatës së Futbollit të Shqipërisë, z. Armand Duka, njëherit edhe anëtari i parë shqiptar në Komitetin Ekzekutiv të UEFA-s, për të degjuar rrefimin e tij për futbollin e femrave në Shqipëri.
“Fillimi ka qënë i vështirë dhe plot të panjohura. Po shkelnim në një terren të panjohur për ne dhe pa eksperiencë. Ishte një e panjohur, por ishte një hap i domosdoshëm. Nuk kishim zgjidhje sepse ishim shumë të vonuar, duke kujtuar se sezoni parë në Shqipëri i futbollit të femrave ka qënë në 2008-2009. Por gradualisht kemi njohur rritje dhe jemi përmirësuar shumë. 13 vite nuk janë shumë, por janë të mjaftueshme për të hedhur themele të forta për të ndryshuar realitetin dhe zgjeruar njohjen e pranimit të futbollit të femrave në shoqërinë tonë. Nuk është diçka e lehtë, por mund ta them se po hedhim hapa cilësorë përpara”,- është shprehur presidenti Duka fillimisht, duke folur për hapat e parë të angazhimit të femrave shqiptare në futboll.
“Padiskutim që i kujtoj dhe gjej rastin nëpërmjet kësaj interviste që t’i falenderoj shumë vajzat nga Kosova për kontributin që kanë dhënë në Kombëtaren shqiptare. Ato vajza kanë qënë një ndihmë e madhe për ne, edhe për faktin se në Kosovë kishte rreth 7 vite që kishte filluar futbolli i femrave me skuadrën e Kosovës së Prishtinës, të krijuar nga miku im Agim Ademi. Ndërkohë që bindja e tyre për të luajtur për Shqipërinë ka qënë gjëja më e thjeshtë, duke parë dëshirën e madhe që kishin për të veshur fanellën kuqezi. Vinin me shumë dëshirë dhe na kanë bërë krenare me paraqitjet e tyre”,- ka thënë z. Duka, duke folur për rolin e vajzave nga Kosova, në fillet e futbollit të femrave në Shqipëri.
“Jemi në rritje të vazhdueshme dhe kjo na gëzon shumë. Është konfirmim i punës së mirë që kemi nisur. Futbolli i femrave është në qendër të strategjisë tonë “Futbolli për Kombin” 2022-2025. Për këtë kemi implementuar disa projekte që ta masivizojmë këtë sport të ri në Shqipëri dhe për të thyer tabutë që në vegjëli dhe te prindërit. Në të njëjtën kohë kemi nisur projektin e ndërtimit të 100 skuadrave vajzash në 100 shkolla 9-vjeçare në të gjithë Shqipërinë, që ka rritur numrin e vajzave që e dashurojnë tashmë futbollin. Vllaznia, ekipi ynë kampion tashmë e ka bërë traditë kualifikimin në 32 më të mirat e UEFA Women’s Champions League dhe le të urojmë që të kapin fazën e grupeve këtë sezon. Në kampionatin vendas ne paguajmë të gjithë skuadrat pjesëmarrëse, stafet e tyre por edhe i sigurojmë uniforma falas, si dhe topat e lojës e stërvitjes. Është një investim i madh nga FSHF, me qëllim rritjen e nivelit dhe kthimin e Shqipërisë në një vend shumë konkurues në arenën ndërkombëtare përsa i përket futbollit të vajzave”,- ka përfunduar me këto fjalë biseda jonë për “Presheva Jonë”, me presidentin e FSHF-së, z. Armand Duka.
Discussion about this post