Pas katër ditësh në kërkim, policia ka mundur të kapë dhe po procedon në gjendje të lirë administratorin e pishinës në Tiranë, ku rrezikoi të mbytej një 25-vjeçare. Në njoftimin e fundit, policia bën me dije se, 52-vjeçari Ylli Hidri është marrë nën hetim për shkak se nuk kishte vënë në dispozicion asistentë në pishinën që administronte për raste të tilla rreziku.
“Specialistët për Hetimin e Krimeve në Komisariatin e Policisë Nr. 4 kapën dhe proceduan në gjendje të lirë shtetasin Y. H., 52 vjeç, i shpallur në kërkim policor për ngjarjen e datës 22.08.2022, ku në ambientet e pishinës që 52-vjeçari administron, ka rrezikuar të mbytet shtetasja E. T. Shtetasi Y. H. do të procedohet në gjendje të lirë në lidhje me këtë rast, pasi nuk kishte përcaktuar një person përgjegjës për të asistuar në raste rreziku për mbytje, sipas rregullave të sigurisë në ambientet e pishinave”, thuhet në njoftim. Kujtojmë se ngjarja ndodhi mbrëmjen e 22 gushtit ku e reja rrezikoi të mbytej në pishinë pasi nuk dinte not.
Discussion about this post