Ish-presidenti, Ilir Meta, pretendon se Autoriteti i Dosjeve ka falsifikuar dokumentet dhe ka përfshirë emrin e tij në dosjet e SHISH. Meta ka publikuar sot pjesë nga një dokument origjinal nga Autoriteti i Dosjeve, ku del falsifikimi për ta akuzuar atë si bashkëpunëtor të Sigurimit të Shtetit. Në një konferencë që zhvilloi sot për mediat, ai nxori një deklaratë me shkrim dore të Filip Talos, i cili kishte tentuar të kalonte kufirin, që mbante datën 9 mars 1990 dhe që ishte konfirmuar si autentike nga Autoriteti i Dosjeve.
Ndër të tjera në deklaratën e tij Talo shkruante se “Para rreth ndonjë 12-14 muajve edhe në vazhdim unë në biseda të ndryshme që kam zhvilluar me Ilir Muratin i kam thënë atij nëse do të dëshironte të vinte me mua jashtë shtetit…”
Në letrën e tij Talo përmend emrin Ilir Murati si personi që ka folur për kalimin e kufirit. Ndërkohë, Meta nxori një tjetër dokument që është shkruar me makinë shkrimi ku nuk përmendet Ilir Murati por Ilir Metaj. “Nga informacioni i T.O dt 2.3.1989 del se objekti Filip Talo i shprehet denoncuesit Ilir Metaj ndër të tjera se…”, thuhet në letrën që Meta deklaron se është e falsifikuar. Ndërkaq, Meta ka deklaruar se do të vazhdojë me rrugë ligjore ndaj Autoritetit të Dosjeve.
Discussion about this post