Një rast i krimit në familje është parandaluar nga “blutë” e kryeqytetit këtë të hënë, ndërsa në pranga ka rënë 37-vjeçari me iniciale M.M. Siç raportohet, 37-vjeçari ka ushtruar dhunë ndaj bashkëshortes dhe e ka kërcënuar me armë zjarri. Gjatë ndërhyrjes së “bluve”, M.M ka hedhur armën nga dritarja dhe është larguar për t’i shpëtuar prangave, por tentativa e tij ka dështuar pasi menjëherë është arrestuar nga policia. Gjatë kontrollit në banesë, policia ka arritur të sekuestrojë armë zjarri pistoletë (gati për qitje), municion luftarak dhe 5 radio marrëse, të cilat lidheshin me policinë.
“Vihet në pranga 37-vjeçari që ushtroi dhunë ndaj bashkëshortes dhe e kanosi atë me armë zjarri.
Sekuestrohen një armë zjarri pistoletë me fishek në fole gati për qitje, municion luftarak dhe 5 radio që dyshohet se lidheshin me valët e radiove të Policisë.
Shërbimet e Komisariatit të Policisë Nr. 5, bazuar në informacionet e marra në rrugë operative se në fshatin Kasallë një shtetas mbante armë zjarri dhe ushtronte dhunë ndaj bashkëshortes, menjëherë kanë organizuar punën dhe kanë finalizuar operacionin policor të koduar “Kasalla”.
Si rezultat i tij u bë kapja dhe arrestimi në flagrancë i shtetasit:
– M. M., 37 vjeç, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Dhuna në familje”.
Shtetasi M. M., mbrëmjen e djeshme ka ushtruar dhunë ndaj bashkëshortes së tij dhe e ka kanosur atë. Ky shtetas në momentin që kanë arritur shërbimet e Policisë, ka hedhur armën e zjarrit pistoletë nga dritarja e banesës dhe ka tentuar të largohet, por është prangosur nga shërbimet e Policisë.”-njofton policia.
Discussion about this post