Ditën e sotme 3 persona janë arrestuar nga policia pasi akuzohen se kanë ndihmuar në kalimin e paligjshëm të kufirit.
Në pranga janë vendosur personat me inicialet, D. Ll., 24 vjeç, M. B., 30 vjeç, dhe M. Gj., 25 vjeç, për veprën penale “Ndihma për kalim të paligjshëm të kufijve”. Identiteti i tyre nuk është bërë me dije, por vetëm inicialet.
Ndërkohë që në kërkim është shpallur bashkëpunëtori i tyre dhe qytetari me inicialet D. Sh., 29 vjeç. Ndërkohë që janë proceduar penalisht edhe 50 emigrantët që po lëviznin nga Tirana në drejtim të Kukësit.
“Finalizohet operacioni policor i koduar “Tranzit 50”, për goditjen e veprimtarisë kriminale të dhënies ndihmë shtetasve të huaj, për kalim të paligjshëm të kufijve. Operacioni, nga specialistët e Seksionit për Hetimin e Trafiqeve të Paligjshme në DVP Tiranë. Vihen në pranga 3 shtetas që u kapën në flagrancë duke transportuar 50 emigrantë të paligjshëm, shpallet në kërkim bashkëpunëtori i tyre.
Procedohen penalisht edhe 50 emigrantët, për kalim të paligjshëm të kufirit. Specialistët e Seksionit për Hetimin e Trafiqeve të Paligjshme në DVP Tiranë, në vijim të punës për goditjen e paligjshmërisë, në bazë të informacioneve të siguruara në rrugë operative se disa shtetas transportonin emigrantë, nga Tirana në drejtim të Kukësit, me qëllim kalimin e tyre në pikat kufitare, me destinacion final vendet e BE-së, organizuan dhe finalizuan operacionin “Tranzit 50”, për goditjen e kësaj veprimtarie kriminale.
Si rezultat i këtij operacioni u bë arrestimi në flagrancë i shtetasve: – D. Ll., 24 vjeç, M. B., 30 vjeç, dhe M. Gj., 25 vjeç, për veprën penale “Ndihma për kalim të paligjshëm të kufijve”. Gjithashtu, u shpall në kërkim shtetasi D. Sh., 29 vjeç.
Shërbimet e Seksionit për Hetimin e Trafiqeve të Paligjshme në DVP Tiranë, në bashkëpunim me Forcën e Posaçme Operacionale dhe Forcën e Posaçme “Shqiponja”, në fshatin Mëzez, në rrugën “7 Nëntori”, kanë konstatuar mjetet me drejtues shtetasit M. GJ. dhe M. B., brenda të cilëve ndodheshin 50 shtetas të huaj.
Sipas verifikimeve të kryera ka rezultuar se shtetasit M. Gj., M. B., D. Ll. dhe D. Sh., në bashkëpunim me njëri-tjetrin, kundrejt përfitimeve monetare, do t’i transportonin 50 emigrantët e paligjshëm nga Tirana në drejtim të Kukësit, me qëllim kalimin e tyre në pikat kufitare, me destinacion final vendet e BE-së. Në vijim të veprimeve u proceduan penalisht 50 emigrantët e paligjshëm, për veprën penale “Kalimi i paligjshëm i kufirit shtetëror”. Në cilësinë e provës materiale u sekuestruan 2 automjetet dhe 6 aparate celulare. Materialet procedurale i kaluan Prokurorisë, për veprime të mëtejshme.”
Discussion about this post