Një javë pas shkarkimit të ish-kreut të Policisë së Shtetit, Gledis Nano, ministri i Brendshëm, Bledi Çuçi pritet të prezantojë sot pasuesin e tij. Çuçi do të zhvillojë sot një mbledhje me drejtorët e Policisë në qarqe dhe drejtorët e departamenteve ku pritet dhe të prezantojë emrin e tij. Mbledhja do të nisë në orën 16:00. Në këtë takim pritet të prezantohet edhe drejtori i ri i Përgjithshëm i Policisë së Shtetit pas shkarkimit të Gledis Nanos. Muhamet Rrumbullaku pritet të emërohet në krye të Policisë së Shtetit.
Lajmi i shkarkimit të Gledis Nanos u dha nga ministri i Brendshëm, Bledi Çuçi, 7 ditë më parë pas mbledhjes së Këshillit të Ministrave, ndërsa e cilësoi si largim për “mospërmbushje të objektivave”.
“Sot qeveria mori vendim për shkarkimin e drejtorit të përgjithshëm të policisë, shkarkim i cili lidhet me mospërmbushje të objektivave që kishim vënë në lidhje me drejtorin e përgjithshëm të policisë dhe kryesisht lidhet me situatën e krijuar në muajt e fundit, situatë që normalisht kërkon një reagim më të fortë dhe një menaxhim më efikas të policisë së shtetit”, u shpreh Çuçi.Shkarkimi i Nanos erdhi pak ditë nga zhdukja e shumë të kërkuarit të operacionit “Plumbi i Artë”, Ervis Martinaj dhe zbulimit të ushtarit të tij brenda policisë së shtetit, ish-agjentit të operacionales, Jeton Lami.
Discussion about this post