Shtetet e Bashkuara të Amerikës kanë reaguar një ditë pas sulmit kibernetik të Iranit ndaj sistemit TIMS në Shqipëri, i cili paralizoi punën në çdo doganë të vendit.
Në një reagim në Tëitter thuhet se ky sulm keqdashës vjen pas atij të 15 korrikut, ku u sulmuan shërbimet online qeveritare.
“Shtetet e Bashkuara dënojnë sulmin kibernetik të 9 shtatorit kundër aleatit tonë të NATO-s, Shqipërisë. Ky aktivitet keqdashës kundër Shqipërisë vjen pas sulmit kibernetik të 15 korrikut të kryer nga qeveria e Iranit. Qeveria e SHBA po mbështet përpjekjet e Shqipërisë për të zbutur dhe rimëkëmbur”, shkruhet në postim.
Me sulmin ndaj sistemit TIMS për disa kohë u paralizua punë në aeroportin e Rinasit, por pas ndërhyrjeve, u arrit që të viheshin në punë dy sportele.
Shtetet e Bashkuara vendosën sanksione ndaj Ministrisë së Inteligjencës së Iranit dhe kreut të këtij institucioni, duke i akuzuar se qëndrojnë pas një sulmi kibernetik ndaj Shqipërisë, në muajin korrik.
Sanksionet e vendosura më 9 shtator, u tha se kanë të bëjnë edhe me aktivitete të tjera kibernetike të Republikës Islamike ndaj Shteteve të Bashkuara dhe aleatëve të tyre.
Ky njoftim vjen pasi Shqipëria, më 7 shtator, bëri të ditur për shkëputjen e raporteve diplomatike me Iranin, për shkak të sulmit të korrikut, dhe urdhëroi diplomatët iranianë dhe stafin diplomatik që të largoheshin nga shteti brenda 24 orësh.
Departamenti amerikan i Thesarit tha përmes një deklarate se Ministria e Inteligjencës dhe Sigurisë së Iranit drejton disa rrjete të autorëve të kërcënimeve kibernetike, përfshirë edhe ata që janë të angazhuar në spiunazh kibernetik dhe sulme kompjuterike, në mbështetje të Qeverisë iraniane.
Discussion about this post