Një javë nga zhdukja e Martinajt/ Policia e Shtetit në “vend numëro”, injoron ultimatumin e Ramës

Është vrarë apo është gjallë dhe çdo gjë është inskenuar për t’u fshehur nga kundërshtarët? Kjo është pikëpyetja që ka shoqëruar prej një jave hetimet për zhdukjen e mistershme të të shumëkërkuarit Ervis Martinajt, ose siç konsiderohet ndryshe si mjeshtri i “lojërave të fatit”.

Disa ditë më parë kur u vendos edhe drejtori i Përgjithshëm i Policisë së Shtetit, kryeministri Rama dha ultimatum për të zbuluar dhe për të gjetur gjurmët ë te shumëkërkuarit.

Kryeministri tha konkretisht: Nëse është vrarë (Ervis Martinaj  sh.r), thoni që është vrarë, nëse nuk është vrarë gjejeni dhe dërgojeni para drejtësisë!

Pavarësisht se kryeministri u duk i prerë në urdhrin e tij, policia nuk di të thotë ende se çfarë ka ndodhur me të cilësuarin “mbreti i lojërave të fatit”, nga i cili nuk ka asnjë gjurmë që prej fillimit të muajit gusht.

Çfarë ka ndodhur me Ervis Martinajn?

Policia nuk ka një version zyrtar në lidhje me çfarë ka ndodhur me të, megjithatë në media deri më tani kanë dalë dy versione kryesore. Një pjesë e gazetarëve të kronikës raportojnë duke iu referuar një videoje që ata thonë se e kanë parë, se Ervis Martinaj është kapur nga kundërshtarët e tij dhe është ekzekutuar. Ndërkohë, versioni tjetër lidhet me një skenar në lidhje me zhdukjen e tij me qëllim shmangien nga policia e cila e kishte shpallur në kërkim, por edhe prej kundërshtarëve pas vrasjeve të fundit në rrethin e tij shoqëror.

“Tërmeti”

Largimi nga terreni i Ervis Martinajt, qoftë i eliminuar fizikisht apo i zhdukur vetë duket se ka krijuar një realitet të ri në botën e krimit të organizuar në vend, të cilët qarkullojnë qindra miliona euro dhe kanë të infiltruar persona të tyret në polici dhe institucionet e tjera ligjzbatuese. Bëhet fjalë për nivele tepër të larta të krimit të organizuar, të cilët mund të kërcënojnë edhe njerëzit e afërt të ministrave apo kryeministrit.

Kush e donte të vdekur Ervis Martinajn?

Mësohet se një ndër ndërhyrjet më të forta të Martinajt në këtë trekëndësh ka qenë momenti kur u tentua monopolizimi i tregut ta basteve në Shqipëri, pak vite pas operacionit “Fundi i Marrëzisë” që e goditi rëndë atë në fund të vitit 2013. Bëhet fjalë sipas Hoxhës për kompaninë “Bast Arena”, në të cilin tentuan të futeshin në lojë një politikan i njohur, i shpallur madje “non grata” nga SHBA-të; një biznesmen i fuqishëm si edhe një i afërmi i një politikani tepër të rendësishëm në vend.

Hoxha u shpreh se me ta mësuar këtë, Martianaj kishte kontaktuar me të tre duke iu thënë se duhej të hiqnin dorë nga kjo tentativë për ta nxjerrë atë tërësisht nga loja. “Bast Arena” u mbyll pak muaj më pas sipas Hoxhës.

Largimi nga skena i Ervis Martinajt mund të çojë në një rigjallërim të tentativave për të monopolizuar tregun e basteve në Shqipëri përmes dhënies së ndonjë licence kombëtare.