Mjaftoi një video virale që ish-nënkampioni i botës në peshëngritje, Ilirian Suli t’i bjerë në sy qeverisë dhe të ketë një punë për të qenë. Pak kohë më parë, ish-nënkampioni i Botës në peshëngritje, Ilir Suli, i rrëqethi të gjithë me deklaratën e tij.
Sot 46 vjeç, Suli tregoi se është i papunë që kur ka lënë sportin teksa në një deklaratë, për “Real News” tha që të gjithë shqiptarë të lënë sa më shpejt vendin e të emigrojnë në një shtet ku të jetojnë normalisht. Sipas tij kjo është gjëja e vetme që ka mbetur. Por menjëherë pas kësaj, qeveria “Rama 3”, u kujtua për të dhe përfitoi nga ky rast për të bërë propagandë.
Së fundmi, ndonëse kanë kaluar kohë nga punësimi i tij në administratë, ministri i Mbrojtjes, Niko Peleshi me stilin e shefit të tij, bën propagandë me punësimin e Sulit. Në një postim në Facebook, ai shkruan se Suli që i dhuroi Shqipërisë medalje bronzi është pjesë e MM.
“Ilirian SULI, është padyshim një nga peshëngritësit më të suksesshëm të vendit tonë. Me mbi 100 rekorde kombëtare, Iliriani është nënkampion bote në peshëngritje, ku në Europianin e vitit 2000 i dhuroi Shqipërisë medalje bronzi. Është pjesë e Ministrisë së Mbrojtjes që nga viti 2021.”-shkruan Peleshi.
Suli është padyshim një nga peshëngritësit më të suksesshëm të një periudhe shumë të vështirë për vendin. Ai është shpallur nënkampion Bote, ka fituar medalje bronzi në Europianin e vitit 2000 dhe ka marrë pjesë në dy olimpiada në vitet 1996 dhe 2000, te të cilat u rendit në respektivisht i 14-ti dhe i 5-ti.
“Këtu në këtë vend çfarë s’po ndodh. Bëni mirë të ikni nga Shqipëria, më dëgjoni mua. A e dini kush jam unë që po ua them këtë? Ilir Suli, mjeshtër i madh i punës nga Presidenti, ish-nën kampion i Botës në shtangë. Mbasi lashë sportin jam papunë. Nuk i duan njerëzit që punojnë këta. Këtu duan vetëm… s’po ua them më mirë. Ikni nga ky vend, kjo ka ngelur vetëm”, deklaroi Ilir Suli, deklaratë që u bë virale.
Discussion about this post