Saimir Batku, njëri nga anëtarët e grupit “kokaina” ku u arrestua dhe nipi i ish-diktatorit Enver Hoxha, Ermal Hoxha, rezulton të jetë dënuar në Itali me 14.1 vite burg. Dënimi i Batkut është dhënë në qershor të 2008 nga gjykata Italiane si i implikuar në trafikun e drogës në këtë shtet.
Ky vendim penal mësohet t’i jetë përcjellë autoriteteve të drejtësisë Shqiptare, të cilat në fund të muajit korrik të këtij viti kanë kryer njohjen e vendimit të gjykatës së Milanos, duke e dënuar Batkun me 14 vite e 1 muaj e dhjetë ditë heqje lirie. Në dosjen hetimore shihet se si Batku falë falsifikimit të orëve të punës ka përfituar 7.8 ditë ulje dënimi.
Pjesë nga dosja hetimore:
Për këtë të dënuar nga ana jonë janë verifikuar 52 ditë pune në IEVP Fier, të shënuara në kartelat e punës, për periudhën Nëntor, dhjetor të vitit 2019.
Nga këqyrja në regjistrin e hyrje daljeve nr.320 protokoll datë 27.11.2018, i cili fillon me datën 14.09.2019 dhe përfundon me datë 29.04.2021, rezulton se për periudhën kohore Nëntor, Dhjetor të vitit 2019 i dënuari Saimir Batku, ka dalë në punë 8 ditë e konvertuar në ulje dënimi 1.2 ditë konkretisht;
Për muajin Nëntor 2019 ka dalë për punë në datat 12,14,21,22, 23, 26 dhe në kartelën e punës është e shënuar 26 ditë punë.
Për muajin Dhjetor 2019 ka dalë për punë në datat 13, 15 dhe në kartelën e punës është e shënuar 26 ditë punë.
Referuar Urdhrit nr.2259, datë 18.03.2008 të Drejtorit të Përgjithshëm të Burgjeve “Mbi punësimin e të dënuarve në burgje dhe paraburgime”. Komisioni i Punësimit i burgosurve ka në përbërje shefat e sektorit ligjor, social, shëndetësisë dhe sigurisë, të cilët ndjekin në dinamikë frekuentimin e procesit të punësimit nga i burgosuri.
Personat përgjegjës që nuk kanë verifikuar frekuentimin e punës nga të dënuarit janë Përgjegjësi i Sektorit të Burimeve Njerëzore Albi Rrezhda, Përgjegjësi i Sektorit të Cështjeve Shoqërore, Eris Isufaj, Përgjegjësi i Sektorit Ligjorë Ervis Alliaj, Shefi i Policisë Bashkim Meci, Përgjegjësi i Sektorit Shëndetësorë Arbëri Gjermeni.
Personat përgjegjës të cilët kanë nënshkruar kartelat e punës janë, evidencieri, Ervis Alliaj dhe Miratuar nga Drejtori i IEVP
Si rezultat i falsifikimit të ditëve të punës nga IEVP Fier në kundërshtim me kriteret e saj i dënuari ka përfituar rreth 7.8 ditë ulje dënimi, nga veprime haptazi të kundra ligjshme kur realisht duhej të përfitonte 1.2 ditë ulje dënimi nga puna.
Momentalisht Batku ndodhet i izoluar në qelitë e burgut të Fushë-Krujës, ku ndodhet i arrestuar për llogari të Prokurorisë së Krimeve të Rënda e cila e akuzon si pjesë e grupit të kokainës që sillte drogën nga Ekuadori në Tiranë dhe më pas e përpunonte në një laborator të ngritur në fshatin Xibrakë të Librazhdit. Veç dënimit që do marrë nga drejtësia Shqiptare, tashme mbi Batkun rëndon dhe dënimi me 14.1 vite burg.
Por çfarë ka ndodhur në burgun e Fierit?
18 punonjës dhe ish-punonjës të Burgut të Fierit akuzohen për vepra të ndryshme penale të zbuluara gjatë një hetimi disa mujor, të nisur që nga muaji maj në bashkëpunim me Prokurorinë e Tiranës dhe SHKB-në e Burgjeve. Të ndaluarit mbajnë postet e përgjegjësve të një sërë sektorëve në burgje, si ai i shëndetësisë, ligjor, i kujdesit social apo burimeve njerëzore. Të gjithë, në bashkëpunim me njëri-tjetrin, ata akuzohen për vepra të ndryshme penale, kryesisht falsifikime në favor të uljes së dënimeve të të burgosurve, duke i liruar para kohës së caktuar për të vuajtur dënimin e tyre.
Shkeljet e gjetura: -19 raste vlerësime sjellje për ulje dënimi janë pasqyruar fakte dhe rrethana të rreme në lidhje me procesin e rehabilitimit e të dënuarve; -6 raste vlerësim sjellje për lirim me kusht janë pasqyruar fakte dhe rrethana të rreme në lidhje me procesin e rehabilitimit e të dënuarve; -28 të dënuarve ju janë dhënë ditë pune në mënyrë fiktive nga IEVP Fier, nëpërmjet falsifikimit të dokumenteve ose shpërdorimit të detyrës e kryer nga punonjës të IEVP Fier: -1 rast i të dënuarit që ka përfituar amnisti, për të cilën nuk ka asnjë dokument referues për dhënien e amnistisë.
Discussion about this post