Gjykata e Lezhës ka dhënë vendimin për 17 vjeçarin Florian Përvathi. Adoleshenti u dënua me 8 vite burg, pasi vrau në janar të këtij viti Lek Lekgjonajn, për të marrë hakun e babait të tij.
Përvathi akuzohet për veprën penale të “vrasjes për gjakmarrje” dhe të “armëmbajtjes pa leje”. Ngjarja ndodhi në fshatin Manati të Lezhës. Pas krimit, 17 vjeçari u dorëzua në polici, ku deklaroi se e kishte kryer vrasjen për të marrë hakun e babait të tij.
Ai zbuloi se ishte pajisur me pistoletë gjatë kohës që studionte për pikturë.
Konflikti mes dy familjeve e ka zanafillën në vitin 2009, kur vëllai i viktimës, Ndue Lekgjonaj vrau babain e autorit, Gjon Përvathin. Në të njëjtën ditë nëna e 17-vjeçarit u helmua dhe i dha fund jetës. Kjo gjë bëri që i mituri të rritet jetim.
Ndërkohë Ndue Lekgjonaj, i cili ndodhet jashtë shtetit, u dënua aso kohe për krimin me 10 vite burg nga të cilat kreu vetëm 7 për shkak të gjykimit të shkurtuar. Drejtësia e cunguar dhe dogma kanunore ndikuan në formimin e adoleshentit, i cili u përfshi në sagën e gjakmarrjes mes dy familjeve.
Discussion about this post