Tragjedia e djeshme në Klos ku mbetën të vrarë tre persona dhe u plagosën dy të tjerë për shkak të një konflikti mes dy familjeve, ka sjellë një reagim të gjerë në opinionin publik. Të dy palët e përfshira, banojnë në fshatra të ndryshëm dhe kishin lënë takim dje në lokal.
Lokali ishte i mbyllur dhe ata janë ulur në verandë. Dëshmitarët thonë se biseda ka zgjatur vetëm 5 minuta dhe më pas kanë ndodhur të shtënat.
Sipas deklaratave të deritanishme, mësohet se ngjarja ndodhi më motive të dobëta, pasi vajza e Fiqiri Mjeshtrit ka deklaruar në polici se shantazhohej në Instagram nga dy kushërinjtë Renato Hasula dhe Kenado Shira, djem tezesh dhe se për këtë shkak kishte ditë që nuk shkonte në shkollë pasi ndihej e frikësuar. Kjo gjendje e së bijës është vënë re nga autori, Fiqiri Mjeshtri, i cili e ka pyetur dhe ajo i ka treguar arsyen.
Pas kësaj, 39-vjeçari bashkë me dy vëllezërit e tij, ka kërkuar që të sqarohet me dy të miturit të cilët morën edhe prindërit e tyre me vete në lokal, Eglantin Hasulën dhe Ilir Shirën. Po ashtu mësohet se në dijeni të konfliktit kanë qenë dhe mësues të gjimnazit në Klos.
Pasi kanë mbaruar shkollën dy kushërinjtë janë pritur nga autori dhe së bashku me prindërit kanë shkuar në lokal që të sqaroheshin, por duket se situata ka agravuar dhe më pas Mjeshtri qëlloi me armë zjarri në drejtim të tyre, duke vrarë babë e bir, Ilir dhe Kenad Shirën dhe plagosi Eglantin dhe Renato Hasulën.
Discussion about this post