Karim Benzema dhe Thibaut Courtois janë dy lojtarët e Real Madrid, ku sulmuesi francez u shpall lojtari më i mirë i sezonit 2021-2022 duke rrëmbyer “Topin e Artë”, teksa gardiani i madrilenëve u shpall portieri më i mirë i sezonit të kaluar.
Belgu ishte në vendin e 7-të në renditjen e përgjithshme të Topit të Artë, pavarësisht formës së tij të jashtëzakonshme në sezonin e kaluar.
I intervistuar nga gazetarët pas përfundimit të ceremonisë, Courtois është shprehur i zhgënjyer.
“Jam shumë i lumtur për Benzema. Nuk po them se do ta kisha fituar, por nuk jam as në podium duke qenë portieri që fitoi Champions League dhe La Liga.
Duket se të shënosh është më mirë se ta ndalosh. Është një betejë që mbetet për t’u fituar. Duke parë logjikën dhe duke ditur se si votojnë, e dija se nuk do të kisha asnjë shans për ta fituar Topin e Artë.
Një portier fitues vitin e ardhshëm? E shoh si të pamundur për një portier”, shtoi portieri i Real Madrid.
Discussion about this post