Në 22 ndeshjet që kanë luajtur mes tyre, Spanja ka humbur vetëm një herë kundër Zvicrës dhe ky është një sinjal pozitiv në prag të sfidës së sotme, e vlefshme për çerekfinalet e Europianit. Zvicra ka luajtur 4 herë në këtë fazë, por i ka humbur 3 të mëparshmet. Spanja nga ana tjetër ka një ecuri fantastike sa u përket golave. Askush nuk e kishte menduar diçka të tillë kur nisi Europiani që Spanja do të ishte skuadra më goleadore.
“Furia e Kuqe” u bë ekip i parë në histori që shënon nga 5 gola në dy ndeshje radhazi të Europianit. Kurrë nuk kishte shënuar më shumë sesa 4 gola në 42 ndeshjet e para të këtij kompeticioni. Meqë jemi te golat, edhe Zvicra ka pasur një rritje në aspektin e golave pasi ka shënuar 3 në 2 ndeshjet e fundit të Europianit.
Kundër Francës pati një saktësi 25% të goditjeve në portë, e thënë ndryshe që shënoi 3 gola me 12 goditje. Efektiviteti nuk është i keq. Por “Furia e Kuqe” ka një armë të fortë në këtë kompeticion dhe në të gjithë historinë e saj, çka është qarkullimi i topit dhe saktësia e pasimeve. Mesatarja e zotërimit të topit nga Spanja është 73%, ndërsa saktësia e pasimeve 90%.
INDIVIDËT- Ferran Torres është sekreti i kësaj skuadre. Ai ka marrë pjesë në 8 gola në 9 ndeshjet e fundit të Spanjës me 7 gola dhe një asist. Ai ka arritur të gjejë rrugën e rrjetës në 2 ndeshjet e fundit dhe nëse shënon një tjetër, mund të bëhet spanjolli i parë që shënon në tri ndeshje radhazi dhe do të ishte rekord. Nuk duhet harruar edhe Alvaro Morata. Me apo pa polemika, sulmuesi i Juventusit është një nga më të rëndësishmit e ekipit të Enrikes. Ai është lojtari me më shumë tentativa në portë dhe ka shënuar 2 gola.
Morata është golashënuesi më i mirë i Spanjës në këtë Europian dhe vendin e parë e ndan me Sarabian e Ferran Torresin, të tre nga 2 gola. Në radhët e Zvicrës duhet të veçojmë sulmuesin Haris Seferoviç, i cili në këtë Europian ka shënuar 3 gola. Pritet një duel spektakolar në Rusi, ku të dyja skuadrat do të japin gjithçka për të arritur në fazën e gjysmëfinaleve të Europianit. Zvicra tregoi se asgjë nuk është e lehtë sepse eliminoi Francën kampione bote.
