Eljon Sota është kthyer në një nga shtyllat e Partizanit këtë sezon. Tashmë një titullar i paprekshëm i të kuqve, Sota e sheh klubin si më të mirin në Shqipëri teksa ka deklaruar para mediave se as e ka menduar largimin e tij nga kryeqytetasit.
Në fjalët e tij para gazetarëve, Sota ka folur për ecurinë e deritanishme të Partizanit dhe duelin në distancë me Tiranën, teksa sipas mbrojtësit, të kuqtë janë penalizuar nga grumbullimi i Kombëtares.
“Vështirësia është edhe te pjesa për të arritur vendin e parë, por e vështirë është edhe për ta mbajtur pasi të gjitha ekipet e tjera bëjnë presion për t’u afruar dhe për të marrë kreun e tabelës. Nga kush ruhemi? Të gjitha ekipet, këtë vit kampionati është i vështirë pasi çdo ekip mund të marrë pikë, mund të fitojë.
Nder nga Erzeni? Po, pak a shumë po, por çdo ekip luan për vete, nuk është se luan për ne. Fillimisht nderin ia bëri vetes pastaj ne.
Pauza nuk besoj se na ndihmon aq shumë për shkak se kemi shumë lojtarë që janë në kombëtare, është thjesht një javë pushim si ndeshjet e tjera, por më shumë nuk na ndihmon se kemi 4 lojtarë në kombëtare.
Thjesht na duhet pak fat, pasi mundësitë i kemi pasur, kemi krijuar raste pa fund, sidomos në ndeshjet që kemi bërë në shtëpi.
Golat? Në fakt janë shumë pak për një ekip si Partizani që synon titullin. Por siç e kemi thënë, edhe trajneri, mjafton të krijojmë rastet se golat do të vijnë. Ka qenë ajo pjesa e fatit.
Titullar fiks? Ka qenë e vështirë në fakt se kur je me ekipe të mëdha si Partizani, konkurrenca është e lartë, sidomos në repartin tim ku kishte lojtarë me eksperiencë që kishin shumë vite këtu. Thjesht me durim, gjërat vijnë.
Gjithmonë kam dashur vetëm të luaj. Por nuk e kam menduar të largohem nga Partizani, sepse ekip më të mirë në Shqipëri se Partizani nuk besoj se gjen.
Egnatia? Shumë ndeshje e vështirë. Egnatia është shumë ekip i mirë, ka marrë trajner me shumë eksperiencë që njeh shumë mirë kampionatin, do të jetë një ndeshje shumë e vështirë që duhet vlerësuar maksimalisht”, tha Sota.
Discussion about this post