Polonia do të ndërtojë një mur në kufirin e saj me enklavën ruse të Kaliningradit.
Lajmin e bëri të ditur ministri i mbrojtjes Mariusz Blaszczak i cili tha se ky vendim vjen për shkak të kërcënimeve ndërkombëtare të sigurisë. Varshava dyshon se Rusia po planifikon të ndihmojë emigantët aziatikë dhe afrikanë për të kaluar ilegalisht kufirin.
“Për shkak të informacionit shqetësues se aeroporti në rajonin e Kaliningradit është hapur për fluturime nga Lindja e Mesme dhe Afrika e Veriut, kam vendosur të marr masa që do të forcojnë sigurinë në kufirin polak me rajonin e Kaliningradit duke mbyllur këtë kufi”.
Me rritjen e tensioneve për shkak të luftës në Ukrainë, ai përmendi shqetësimet e sigurisë dhe iu referua krizës së shkaktuar vjeshtën e kaluar kur mijëra emigrantë afrikanë dhe nga Lindja e Mesme u përpoqën të kalonin kufirin e Bjellorusisë për në Poloni, disa prej të cilëve ndërruan jetë.
Bashkimi Europian në atë kohë akuzoi Bjellorusinë se i ka dërguar emigrantët për të destabilizuar Europën por Minsku mohoi akuzat. Kufiri do të pajiset me masa të ndryshme sigurie elektronike dhe pritet t’i kushtojë qeverisë polake 75 milionë Euro.
Discussion about this post