Gjuha e ashpër e kryeministrit Edi Rama ndaj deputetëve të opozitës gjatë seancës plenare të së mërkurës është e papranueshme edhe për vetë socialistët si Fatmir Xhafaj.
Në diskutimet e së enjtes në Kuvend, ai tha se etika politike është zëvëndësuar me shprehje ordinere.
“Fryma e debatit normal, konsensusit politik dhe etikës politike, tashmë është zëvendësuar nga konflikti i ashpër politik i ndërtuar mbi batutën fyese, shprehjet përçmuese dhe jo rrallë ordinere, retorikën e ashpër, gjuhën e baltës dhe shpifjen. Dëshpërimisht kjo lloj qasje e gabuar është shndërruar në normalitet dhe instrument i të ashtuquajturës luftë politike”, tha Xhafaj.
Por Xhafaj nuk u ndal me kaq. Ai kundërshtoi edhe buxhetin e qeverisë për vitin e ardhshëm, ku në konstrast me deklaratat se vendi është në luftë, qeveria nuk heq dorë nga shpenzimet si në kohë paqeje.
“Është absurde që kur flasim për kohë lufte të programojmë disa investime dhe shpenzime si në kohë paqeje. Kjo edhe për faktin se këmbanat e krizës energjetike dëgjohen për herë e më pranë si një pandemi e re ekonomike.”
Sipas Xhafajt në këto kohë të vështira buxheti duhej të fokusohej më shumë tek familje e varfëra dhe pensionistët pa mbështetje shtesë.
“Buxheti edhe në këto kushte shtrëngese mund dhe duhet të ishte më shumë i fokusuar te grupet e interesit apo xhepin e të pamundurit, veçanërisht te pensionistët pa mbështetje shtesë.”
Kritika ndaj projektit të qeverisë kishte edhe socialisti tjetër Erion Braçe. Ish-zv.kryeministri tha se GDP-ja nuk mjafton dhe se duhet të bëhet rishpërndarje e të ardhurave nga qeveria.
Discussion about this post