Një 33 vjeçare është dhunuar një ditë më parë nga njerëzit e ish bashkëshortit. Ngjarja ka ndodhur në fshatin Markatomaj i Lezhës, ku Dava Ndoj është dhunuar nga familjaret e burrit me të cilin është në proces divorci.
33 vjeçarja bën me dije se është dhunuar, teksa thekson se ka që në janar që e ka nisur këtë luftë me familjen e ish bashkëshortit dhe se asnjë urdhër mbrojtje nuk është marrë parasysh.
Sipas saj, avokati i ish-bashkëshortit është dhe dhëndri i shtëpisë ku ajo ka qenë nuse dhe bashkëshorti i ish-kunatës e cila bashkë me dy fëmijët dhe prindërit kanë dhunuar 33-vjeçaren.
Mes lotësh në sy 33-vjeçarja Ndoj, thotë se nuk ka gjetur mbështetje nga institucionet shtetërore, të cilët i akuzon për mos zbatim të ligjit.
“Unë në atë moment kam qenë duke ndenj me djalin, aty ka ardhur motra e ish burrit dhe më ka goditur. Më ka sulmuar sh kunata bashkë me dy fëmijët e saj dhe dy prindërit. Plaku më ka goditur më shumë bashkë me vajzën e tij. Unë jam me urdhër mbrojtje por deri më tani nuk kam gjetur drejtësi. Nuk është zbatuar ligji. Lufta që me 16 janar. Avokati është dhëndri i shtëpisë, dhe nusja e tij është ajo që më ka goditur bashkë me djalin e vajzën e saj. Ne jetonim në një shtëpi se kam katër fëmijë. Unë kam marrë urdhër pas urdhri, unë prej dy muajsh jetoj në shtëpinë time pa ujë dhe drita se nuk kam paguar dhe ma kanë ndërprerë. Vështirësia më e madhe është se djalin e madh e kam me probleme shëndetësore se bën dhe insulinë”, ka thënë 33 vjeçarja.
