Shtyhet sërish seanca gjyqësore ndaj Arbër Paplekajt. Ai akuzohet për vrasjen e Pjerin Xhuvanit, ngjarje kjo e ndodhur në Elbasan, vetëm pak ditë para zgjedhjeve të 25 prillit 2021. Shkak për këtë vendim është bërë fakti se nuk janë njoftuar të gjitha palët. Në rastin konkret bëhet fjalë për Emiljano Prengën, i cili mbeti edhe i plagosur, nga përplasja me armë. Ndërkohë Arbër Paplekaj nuk ishte sot i pranishëm në seancë.
Ndaj Arbër Paplekajt rëndon akuza për ‘vrasje me dashje në rrethana cilësuese’. Sipas Kodit Penal, Papleka rrezikon nga 20 vite burg deri në burg të përjetshëm. Ndërkohë, dy zv.drejtorët e policisë Nikollaq Pallën, Albert Nushin dhe 6 policët e forcave ‘Shqiponja’ akuzohen shpërdorim detyre.
Si ndodhi ngjarja
Vrasja e Pjerin Xhuvanit u regjistrua më 21 prill pak ditë para zgjedhjeve parlamentare të 25 prillit, ku Xhuvani u qëllua me armë nga Arbër Paplekaj, shoqëruesi i kreut të listës së Partisë Demorkatike në këtë qytet, Gazmend Bardhi. Të plagosur mbetën edhe katër persona të tjerë, Emiljan Prenga, Pavlo Vuksani, Eltjon Bodinaku dhe Xhensila Sota ( punonjëse e policisë). Paplekaj pranoi krimin dhe u vetëdorëzua në Repartin e Forcave RENEA në Tiranë duke thënë se qëlloi për vetëmbrojtje pasi u qëllua më parë nga persona që sipas tij po blinin vota.
Discussion about this post