Ajo luan me ngjyrat në një mënyrë krejt të veçantë, një mënyrë që thotë se përfaqëson tërësisht gjendjen e saj emocionale. Por ndryshe nga shumë piktorë të tjerë, penelin e ka hedhur tutje dhe bojërat i përzien në telajo vetëm me duart e saj. Adela Osmani ka nisur të pikturojë që në moshën 8 vjeçare dhe për shumë vite me radhë ka studiuar teknika të ndryshme, deri sa gjeti veten dhe frymëzimin e duhur për tu shfaqur tek publiku me punimet e saj.
“Zakonisht frymëzohem tek lulet ose natyra e qetë por varet nga gjendja ime emocionale. Teknika me të cilin punoj më përfaqëson më së miri mua dhe vetë gjendjen time shpirtërore. Pasi bëj përzierjen e bojërave, hedhja e tyre në telajo dhe punimi i pikturës bëhet vetëm me duar, pra pa penela”-shpjegon 22 vjeçarja.
Ka realizuar deri më sot me qindra piktura, shumë prej të cilave dikur ua dhuronte miqve apo të afërmeve. Sot, biznese të shumta kërkojnë që ajo të realizojë punime enkas për ambjentet e tyre. Piktura më e fundit e saj, u shit jo pak por për një vlerë prej 1200 euro.
“Më pëlqente shumë tu dhuroja njerëzve pikturat e mia, por vura re se në shumë raste nuk e vlerësonin sa duhet. Tani që i shes punimet e mia, kam më shumë kërkesa”
E ndërsa piktura mbetet pasioni, Adela aktualisht po studion për interior design, pasi është e bindur se kështu do të ketë një të ardhme të sigurt edhe në tregun e punës. Veç kësaj, dega që ka zgjedhur ngjason me pikturën pasi ka lirinë të krijojë duke luajtur me ngjyrat dhe detajet.
Piktorja e re nga Durrësi ëndërron që pikturat e saj të shkojnë larg, përtej kufijve të Shqipërisë, madje përtej Oqenit. Ndërsa për veten e saj ende nuk ka vendosur se çfarë do të bëjë pas përfundimit të studimeve master. Por një gjë është e sigurt, Adela ka projekte të mëdha për të ardhmen, kudo që të shkojë.
