Organizata Botërore e Shëndetësisë thotë se spitalet në Kinë duket se po mbushen mes shqetësimeve për një valë të re Covid-19 që godet vendin. Dr Michael Ryan thotë se njësitë e kujdesit intensiv (ICU) janë të zëna, pavarësisht se zyrtarët thonë se numrat janë “relativisht të ulët”.
Sipas BBC, shifrat e Kinës tregojnë se askush nuk vdiq nga Covid të mërkurën, por ka skepticizëm për ndikimin e vërtetë të sëmundjes. Ditët e fundit spitalet në Pekin dhe qytete të tjera janë mbushur plot, ndërsa rritja e fundit Covid godet Kinën.
Numri i rasteve është rritur që atëherë, duke rritur frikën për një shkallë të lartë vdekshmërie tek të moshuarit, të cilët janë veçanërisht të prekshëm. Pavarësisht rritjes, shifrat zyrtare tregojnë se vetëm pesë persona vdiqën nga Covid të martën dhe dy të hënën.
Kjo ka bërë që shefi i urgjencave të OBSH-së Dr Ryan t’i kërkojë Kinës të japë më shumë informacion në lidhje me përhapjen e fundit të virusit.
Duke folur gjatë një konference javore për shtyp në Gjenevë, shefi i OBSH-së Tedros Adhanom Ghebreyesus tha se ai është “shumë i shqetësuar për situatën në zhvillim në Kinë”. Ai bëri thirrje për të dhëna specifike për ashpërsinë e sëmundjes, shtrimet në spital dhe kërkesat e kujdesit intensiv.
Kina ka zhvilluar dhe prodhuar vaksinat e veta, të cilat janë treguar të jenë më pak efektive në mbrojtjen e njerëzve kundër sëmundjeve serioze Covid dhe vdekjes sesa vaksinat mRNA të përdorura në pjesën më të madhe të botës.
Që nga viti 2020, Kina ka vendosur kufizime të rrepta shëndetësore si pjesë e politikës së saj zero Covid. Por, qeveria i dha fund shumicës së këtyre masave dy javë më parë pas protestave historike kundër kontrolleve të rrepta.
Discussion about this post