Ndërkohë që opinioni publik është i mbërthyer tek ngjarja e “pastrueses hajdute” dhe rreth 120 mijë euro që u vodhën në shtëpinë e zyrtares qeveritare, Alda Klosi. Një tjetër histori “pastrimi” të 3.7 milionë eurove nga Buxheti i Shtetit po zhvillohej me qetësi dhe larg vëmendjes së qytetarëve.
Pasditen e së Mërkurës, Fondi Shqiptar i Zhvillimit ka rikthyer në skenë tenderin për ndërtimin e instalacionit të drurit në oborrin e selisë së kryeministrit Edi Rama. Në faqen zyrtare të Agjencisë së Prokurorimit Publik është hequr statusi “i pezulluar” i procedurës “Instalacion me strukturë druri në oborrin e brendshëm të Kryeministrisë, “Parku Eden”, me fond limit 431.403.183 lekë të reja.
Procedura është hapur fillimisht në Gusht të vitit 2022. Por ajo u pezullua përkohësisht, pas reagimit të fortë publik ndaj këtij shpenzimi luksos dhe të tepruar të kryeministrit. Tashmë, Dritan Agolli i Fondit Shqiptar të Zhvillimit ka vendosur ta rikthejë sërish aktive procedurën dhe pret ofertat e kompanive private deri në datën 27 Janar 2023.
Historia e “kullës prej druri”
Në shtator të vitit 2022, arkitekti futurist austriak, Chris Precht, detyrohet të ndërpresë një intervistë me gazetën “Der Standart”, pasi, sipas tij, i duhej t’i përgjigjej një telefonate të kryeministrit shqiptar, Edi Rama.
“Rama kërkon një projekt për në Tiranë”, i tha Precht gazetares, pasi mbylli komunikimin me kryeministrin shqiptar. Ky detaj ishte tërësisht i panjohur për publikun shqiptar dhe, në kohën e bisedës, askush nuk e dinte për çfarë bëhej fjalë, përveçse dy personave që zhvilluan telefonatën-Rama dhe Chris Precht.
Dy vjet më pas, në Korrik të vitit 2022, Këshilli i Ministrave, me propozim të shefit të qeverisë, Edi Rama, ngarkon FSHZH që të ndërmarrë procedurat për ndërtimin e një instalacioni druri në oborrin e Kryeministrisë. Fondi Shqiptar i Zhvillimit, në 28 Gusht 2022, shpall procedurën për ndërtimin, e cila i ngjan më shumë një kulle druri, me vlerë mbi 3.7 milionë euro.
Tenderi shkaktoi menjëherë reagimin e ashpër public. Vendi, në atë kohë, si edhe sot, vuan një krizë të thellë ekonomike, me inflacion që ka “kapur qiellin”, me çmime shumë herë më të larta se një vit më parë dhe me një menaxhim skandaloz fondesh publike.
Në këto kushte, vendimi i Ramës për të shpenzuar gati 4 milionë euro për një projekt tërësisht të parëndësishëm për jetën shoqërore dhe ekonomike të qytetarëve, natyrisht që nuk do të mirëpritej nga opinion publik.
Rama, i vendosur nën presionin qytetar, u detyrua të bëj një sqarim për projektin. Ai deklaroi se nuk bëhej fjalë për shpenzime luksi, por një projekt për energji të rinovueshme.
Sipas tij, instalacioni prej druri do të shërbente për vendosjen e paneleve të posaçme që do të prodhonin energji nga drita e diellit, duke kursyer energjinë elektrike të prodhuar nga hidrocentralet. Justifikimi i Ramës nuk bindi askënd. Dhe kishte disa arsye. Më së pari, qytetarët nuk mund të kapërdinin faktin se po shpenzoheshin 3.7 milionë euro për një kullë druri, sado e bukur të duket ajo në letër.
Nga ana tjetër, dokumentat e procedurës dëshmonin se panelet diellore nuk kishin lidhje me instalacionin prej druri. Ato do të vendosen në tarracën e godinës aktuale të Kryeministrisë. Pra, u kuptua qartë se nuk ishte aspak e nevojshme që të ndërtohej kulla prej druri për të vendosur panelet e energjisë së rinovueshme.
Kryeministri Rama nuk ia doli të zbuste euforinë e qytetarëve me justifikimet e tij pa bazë, ndaj zgjodhi një alternativë tjetër. Në Tetor të vitit 2022, Fondi Shqiptar i Zhvillimit vendosi pezullimin e procedurës. Me shumë mundësi për të ulur tempin e revoltës dhe për ta rikthyer në një moment më të përshtatshëm.
Dhe, ky moment duket se është fillimi i këtij viti. Në 11 janar, Fondi Shqiptar i Zhvillimit e rikthen aktiv tenderin për ndërtimin e instalacionit prej druri. Opinioni publik tashmë është i përqëndruar tek pastruesja Rozeta Dobi dhe vjedhja që ajo i bëri kasafortës në shtëpinë e Alda Klosit, ish-bashkëpunëtores së ngushtë të Arben Ahmetaj.
Lexo edhe : Dritan Agolli bën realitet ëndrrat e Ramës, hap tender 4 mld lekë për instalacion në kryeministri
Discussion about this post