Xhama të thyer dhe makina të dëmtuara, pamje nga shpërthimi

Në orët e para të mëngjesit të sotëm një sasi lëndë plasëse ka shpërthyer para banesës së Pëllumb Shpatit në lagjen Dobraç, Shkodër.

Dyshohet se ngjarja ka ndodhur për shkak të detyrës së Shpatit, i cili është shef Seksioni për Hetimin e Krimeve, në komisariatin e Policisë Shkodër. Si pasojë e këtij shpërthimi mësohet se janë shkaktuar dëmtime të lehta në banesë dhe automjetin e tij.

Policia është në vendin e ngjarjes dhe po punon për zbardhjen e plotë të ngjarjes si edhe identifikimin dhe kapjen e autorëve.

Pas ngjarjes për mediat ka folur babai i Pëllumbit, Gjergj Shpati, i cili është shprehur se shpërthimi ka qenë i fuqishëm dhe se sipas tij ka dëme të mëdha materiale.

I ati tregoi gjithashtu se në shtëpinë tre katëshe jetojnë tre familje me 17 anëtar dhe se të gjithë kanë qenë në shtëpi në momentin kur ka ndodhur shpërthimi. Siç është shprehur ai, kjo ngjarje ka ardhur për shkak të detyrës të së birit si shef i krimeve.