Skuadra e Dinamos ka zbritur sot në fushë për ndeshjen e parë miqësore të fazës përgatitore për edicionin e ri. Ekipi i drejtuar nga Bledi Shkëmbi, është ndeshur sot në “Selman Stërmasi” me Burrelin, në një sfidë e cila shërbente në fakt më shumë për të parë gjendjen e lojtarëve pas ditëve të para të stërvitjes e sidomos të disa futbollistëve që janë në provë te blutë kryeqytetas.
Në sfidën që u mbyll 0-0, Shkëmbi zgjodhi që pikërisht lojtarët e rinj apo ata që janë në provë, të luanin nga minuta e parë në këtë sfidë ndaj matjanëve, pasi në këto momente dëshiron të kuptojë se kush prej tyre është më pranë formacionit të parë.
Ndërkohë, pjesa më e madhe e titullarëve të projektuar për sezonin e ri si Harizaj, Isaevski, Siljanovski, Demiri, Gavazaj apo Ibraimi, u aktivizuan në pjesën e dytë të sfidës. Edhe pse nuk u gjet rruga e rrjetës, trajneri korçar mori sinjalet e para për gjendjen fizike të futbollistëve, për të kuptuar se si është situata e secilit prej tyre pas ngarkesave fizike të ditëve të para të stërvitjes të kryeqytetaseve.
