Agron Rehfeldt është 51-vjeçari që u arrestua ditën e djeshme nga Policia Kufitare në Kukës. Ai ishte i shpallur në kërkim ndërkombëtar nga Interpol Abu Dhabi, Emiratet e Bashkuara Arabe, për veprën penale “Grabitje me armë”.
Gjatë verifikimit u zbulua se ai ishte në kërkim pasi Interpol Abu Dhabi, Emiratet e Bashkuara Arabe, për vjedhjen e kryer në vitin 2011. Në Emiratet e Bashkuara Arabe, ai së bashku me persona të tjerë, kanë thyer një dyqan bizhuterish, duke vjedhur një sasi prej rreth dy kilogramësh bizhuteri floriri.
SI NDODHI GRABITJA?
Ngjarja ka ndodhur me datë 05.07.2011, pas mesnatës. Autorët kanë arritur të futen në katin e sipërm e pastaj në katin poshtë të dyqanit ku ndodheshin bizhuteritë, të cilat pasi që i kanë marrë, i kanë groposur në një vend tjetër, e pastaj kanë ikur në Kosovë.
Gjykata Themelore në Prishtinë, me datë 30.04.2019, pas shqyrtimit fillestar, kishte shpallur fajtor të akuzuarin për vjedhje të floririt në Dubai dhe i kishte caktuar dënim me burgim prej një viti, dënim ky që nuk do të ekzekutohej në qoftë se i akuzuari nuk përsëriste vepër tjetër penale brenda periudhës verifikuese prej 2 viteve.
Ky dënim kishte ardhur si rezultat i pranimit të fajësisë nga i akuzuari dhe Gjykata e Shkallës së Parë kishte konsideruar se dënimi me burgim me kusht ishte i mjaftueshëm për t’u arritur qëllimi i tij.
