Aksident në Fier-Levan, dy familje përfundojnë në kanal, flasin drejtuesit
Një aksident i rëndë ka ndodhur mëngjesin e sotëm në by-passin Fier-Levan, ku janë përfshirë dy automjete, të cilat pas përplasjes kanë dalë nga rruga.
Tre persona kanë mbetur të plagosur dhe janë transportuar në Spitalin e Fierit. Në makinën e parë ka qenë një familje me 3 persona nga Korça, ndërsa në makinën tjetër udhëtonte një familje me 4 persona nga Prizreni.
Të plagosurat janë tre gra, nënë e bijë në makinën që udhëtonte nga Prizreni dhe gruaja e personit që drejtonte automjetin nga Korça. Makinat janë përplasur kokë më kokë dhe kanë përfunduar në kanalin anësor pranë rrugës.
I pyetur nga gazetarët që kanë mbërritur në vendngjarje, drejtuesi që udhëtonte nga Korça është shprehur se po udhëtonte me 90 km në orë dhe ka marrë një goditje nga mbrapa duke përfunduar jashtë rruge.
“Po udhëtoja me 90 km në orë, nga pas ndiej goditje. Mendova të mbaja makinën në rrugë, por e pamundur. Përfundova në kanal, pas meje dhe makina tjetër” u shpreh drejtuesi nga Korça.
Ndërsa drejtuesi që udhëtonte nga Prizreni, i cili punon si mjek në spitalin e Prizrenit është shprehur për gazetarët se shkaku i lodhjes nga orët e tejzgjatura të punës për shkak të Covidit, kanë bërë që të humbasë kontrollin e makinës.
“Tre ditë kam që mora këtë makinë, e shita të parën, e mora këtë. Isha i lodhur, ka shumë ditë që punojmë me orë të gjata për Covidin”, u shpreh drejtuesi që udhëtonte nga Prizreni.
Makinat, njëra me targa të Korçës dhe tjetra me targa të Kosovës lëviznin në drejtim të Vlorës për pushime, ndërkohë që në vendin e ngjarjes janë përhapur valixhe dhe ushqime të dy familjeve.
