Vetëm pak minuta pas raportimit të plagosjes së një 60-vjeçareje në Korçë, një tjetër plagosje me thikë ka ndodhur në këtë qytet. Burimet policore bënë të ditur se ngjarja ka ndodhur rreth orës 12.15 në afërsi të resortit “Montrelux” në malin e Moravës në Korçë, i cili më parë njihej si “Morava Resort”.
Sipas të dhënave policore, dy protagonistët e ngjarjes, Anri Reli dhe Sotiraq Misha, kanë nisur një debat për motive pronësie. Debati ka degjeneruar në dhunë mes palëve, ku Anri Reli, i cili është djali i Arben Relit, pronari i resortit të famshëm në Moravë, ka nxjerrë thikën dhe ka goditur Mishën.
Menjëherë pas kësaj ngjarje, i plagosuri është dërguar me urgjencë në spitalin e Korçës, ku ndodhet në gjendje të rëndë shëndetësore. Burimet nga spitali thanë se Misha ka marrë dëmtime të rënda afër qafës. Ndërkohë, policia ka shkuar në vendin e ngjarjes dhe ka mundur të vendosë në pranga të dyshuarin e plagosjes. Policia tha se po punon për sqarimin e plotë të rrethanave të ngjarjes.
Kujtojmë se disa muaj më parë, prokuroria akuzoi pronarin e resorit “Montrelux”, Arben Reli për ndërtim pa leje. Sipas hetimeve, Arben Reli ka ndërtuar mijëra metra katrorë në ish “Morava Resort”. Këto, të ndërtuara ditën dhe natën. Është hedhur beton, hekur, janë vendosur tulla dhe është bërë çati. Ende nuk dihet nëse sherri i të birit ka lidhje me pronat për këtë ndërtim, por edhe kjo pistë po hetohet nga policia./ Gijotina.com
