Këngëtari me origjinë shqiptare Gjon Muharremaj, i njohur edhe me emrin e artit si Gjon’s Tears, ka mahnitur të gjithë Eurovisionin me stilin, potencën dhe emocionin që ai përcjell në skenë. Në këtë mënyrë ai nuk ka bërë krenar vetëm Zvicrën, shtetin që përfaqësoi, por edhe Shqipërinë.
Gjatë një bisede me Kryeministrin e Republikës së Kosovës, Albin Kurti, këngëtarti shprehet se krejt çka ai dëshiron është që muzika e tij të lë gjurmë dhe që njerëzit ta ndjejnë atë në të gjitha mënyrat e mundshme.
Kryeministri Kurti e përgëzoi këngëtarin për emocionet që ju dhuron njerëzve me zërin e tij të kristaltë dhe për përfaqësimin dinjitoz në garën e Eurovisionit 2020, ku ai përfaqësoi Zvicrën, me këngën “Tout l’univers”.
“Arritja më e madhe e një artisti është kur arti i tij stepë pa joshje shikuesin apo dëgjuesin. Ti Gjoni e ke arritur këtë në ‘Eurovision’”, i tha kryeministri.
Gjon Muharremaj e falënderoi kryeministrin për vlerësimin dhe tha se është i lumtur që më interpretimin e tij e ka bërë krenar popullin shqiptar kudo që është.
“Për mua merr më shumë kuptim kjo krenari meqenëse unë jam fëmijë i një babai nga rrethina e Suharekës në Kosovë dhe e një nëne nga rrethina e Tiranës, në Shqipëri”, tha ai.
Këngëtari 23- vjeçar, që me zërin e tij unik ka fituar admirimin e miliona adhuruesve anekënd globit e njoftoi kryeministrin për planet që i ka në të ardhmen, ofertat e shumta muzikore dhe koncertet që planifikon t’i realizojë në vendlindjet e prindërve, si edhe nëpër shtete të tjera të Evropës, gjithnjë duke i respektuar masat për parandalimin e përhapjes së variantit të ri të virusit.
“Po provoj të jem një dritë e vogël në këtë situatë të pandemisë”, tha ai.
