Disa vatra zjarri vijojnë të jenë aktive në vendin tonë. Ministria e Mbrojtjes ka dhënë informacion për situatën e zjarreve në vend, ku situata vijon të mbetet problematike në majën e Runës, pavarësisht se vazhdon puna për ta vënë nën kontroll zjarrin.
Sipas ministrisë zjarri në fshatin Kodër Thirrë, njësia administrative Fan të bashkisë Mirditë vijon të jetë aktiv, ku deri më tani është djegur rreth 230 ha sipërfaqe me barishte, pyll dushku dhe lisi.
Për shkak të shkurreve të dendura, e vështirë ka qenë situata edhe në fshatin Katund i Vjetër, Malung, njësia administrative Rubik të bashkisë Mirditë, ku ka vijuar gjatë gjithë ditës puna për shuarjen e zjarrit.
Më poshtë njoftimi i Ministrisë së Mbrojtjes
Qarku Kukës
Zjarri në Majë e Rrunës, njësia administrative Malzi, bashkia Kukës vijon puna për shuarjen e zjarrit aktiv, i cili vijon të mbetet problematik. Në vendngjarje kanë punuar 30 forca ushtarake, 10 forca zjarrfikëse.
Qarku Shkodër
Zjarri në fshatin Flet, njësia administrative Blerim, bashkia Fushë-Arrëz, ka qenë aktiv, por vatra ishte e qetë dhe pa rrezik për përhapje.
Zjarri në fshatin Srriqe, njësia administrative Qafë-mali, bashkia Fushë-Arrëz, vijon puna për shuarjen e vatrës aktive.
Zjarri në fshatin Armiraj, njësia administrative Qafë-Mali, bashkia Fushë- Arrëz vijon të jetë aktiv.
Qarku Vlorë
Zjarri në Malin Çipin të fshatit Mesaplik, njësia administrative Brataj, bashkia Selenicë vijon të jetë aktiv. Aktualisht nuk ka rrezik për zonën e banuar.
Qarku Lezhë
Zjarri në fshatin Kodër Thirrë, njësia administrative Fan, bashkia Mirditë vijon të jetë aktiv. Deri tani është djegur rreth 230 ha sipërfaqe me barishte, pyll dushku dhe lisi.
Zjarri në fshatin Domgjon dhe Munellë, njësia administrative Fan, bashkia Mirditë vijon të jetë aktiv.
Zjarri në fshatin Katund i Vjetër, Malung, njësia administrative Rubik, bashkia Mirditë, ka vijuar gjatë gjithë ditës puna për shuarjen e zjarrit të rënë në një sipërfaqe me shkurre të dendura dhe pyll.
Qarku Dibër
Zjarri në fshatin Lundre, njësia administrative Ulëz, bashkia Mat pas një pune të kryer nga helikopteri dhe nga forcat në terren është drejt shuarjes. Nuk ka rrezik për zonën e banuar. MZSH Dibër së bashku me 6 forca nga shërbimi pyjor po punojnë për mbajtjen nën kontroll të zjarrit dhe shuarjen e tij.
Qarku Fier
Më datë 23.08.2021, ora 15:00, në fshatin Mollaj, Njësia Administrative Hekal, bashkia Mallakastër, ka rënë zjarr në një sipërfaqe me shkurre, ullishte dhe pisha. Shërbimi vendor i MZSH Mallakastër ka shkuar në vendngjarje dhe po punon për shuarjen e zjarrit. Nga informacioni paraprak zjarri është nën kontroll.
Qarku Tiranë
Më datë 23.08.2021, ora 12:05, në fshatin Mengaj, Njësia Administrative Helmës, bashkia Kavajë, ka rënë zjarr në një sipërfaqe me shkurre dhe pisha. Shërbimi vendor i MZSH Kavajë ka shkuar në vendngjarje dhe po punon për shuarjen e zjarrit.
