Departamenti Amerikan i Shtetit ka publikuar sot një mesazh për të gjithë shtetasit amerikanë që duan të vijnë në Shqipëri. Në faqen zyrtare të DASH, shkruhet se të gjithë personat që duan të vijnë në vendin tonë, të rishikojnë udhëtimin për dy faktorë: krimi dhe rastet e Covid.
“Rishqyrtoni udhëtimet në Shqipëri për shkak të Covid-19. Rreziku juaj për të kontraktuar COVID-19 dhe për të zhvilluar simptoma të rënda mund të jetë më i ulët nëse jeni plotësisht të vaksinuar me një vaksinë të autorizuar nga FDA. Para se të planifikoni ndonjë udhëtim ndërkombëtar, ju lutemi rishikoni rekomandimet specifike të CDC për udhëtarët plotësisht të vaksinuar dhe të pavaksinuar. Ushtroni kujdes të shtuar në Shqipëri për shkak të krimit”, thuhet ndër të tjera në mesazh.
Në paralajmërimin për Lazaratin, DASH thotë se situata e sigurisë atje është e paqëndrueshme dhe Policia lokale ka aftësi të kufizuara për të mbrojtur udhëtarët.
“Situata e sigurisë në Lazarat mbetet e paqëndrueshme për shkak të krimit dhe dhunës që lidhen me kultivimin e marihuanës. Policia lokale ka aftësi të kufizuar për të mbrojtur dhe ndihmuar udhëtarët. Qeveria amerikane nuk është në gjendje të ofrojë shërbime emergjente për qytetarët amerikanë në Lazarat pasi punonjësve të qeverisë amerikane u ndalohet të udhëtojnë atje”, mbyllet mesazhi i DASH.
