Redon Leka u arrestua si i dyshuari i hedhjes së kapsollave në natën finale ku performoi Goran Bregoviç. Seanca e cila u zhvillua ditën e sotme, filloi rreth orës 10:30. Prokuroria kërkoi masën e arrestit me burg, çka u pranua nga Gjykata.
I riu rezulton me precedent të mëparshëm penal në fushën e prodhimit e shitjes së narkotikëve, trafiqeve të paligjshme dhe krimeve kundër pronës.
Por duket se Redon Leka nuk ishte i vetëm në këtë incident, pasi policia tha se filluan procedimin penal edhe për shtetasin F. K., 33 vjeç, banues në fshatin Xeng, Lushnjë.
Veprimet policore erdhën pasi mbrëmjen e së dielës gjatë Festës së Birrës në Korçë, 21-vjeçari Redon Leka, ka hedhur kapsolla lakrimogjene, duke prishur koncertin e serbit Bregoviç.
Por policia thotë se Redon Leka hodhi bombat tymuese, “me qëllim cënimin e rendit dhe sigurisë publike në aktivitet”.
Kur zona VIP e shfaqjes u mbulua nga tymi, njerëzit aty rrotull u larguan. Megjithatë një pjesë u rikthyen dhe ndoqën koncertin.
Gjatë shoqërimit të shtetasit Redon Leka, për në ambientet e Komisariatit, shtetasi tjetër F. K., ka kundërshtuar forcat e policisë, me qëllim pengimin e tyre në kryerjen e detyrës.
Duket se plani për prishjen e koncertit u la në mes, pasi në vendngjarje u gjet dhe u sekuestrua në cilësinë e provës materiale, një kapsollë detonatore e paplasur.
