Një vrasje mafioze ka tronditur Malësinë e Madhe, ku është qëlluar me armë zjarri një person, teksa lëvizte me makinën e tij. Ngjarja e rëndë ka ndodhur në orët e vona të mbrëmjes, ndërkohë që policia ka nisur menjëherë hetimet për këtë krim të rëndë.
Burimet policore bënë të ditur se vrasja mafioze ndodhi rreth orës 22.50 në fshatin Reç të Malësisë së Madhe, kur Sokol Çelaj, 58 vjeç, lindur në Malësi të Madhe dhe banues në Durrës, është qëlluar me armë zjarri, teksa ka qenë duke lëvizur me makinën e tij. Pas këtij atentati, persona të rastësishëm kanë transportuar të plagosurin për në spitalin e Shkodrës, por mësohet se ai ka ndërruar jetë për shkak të plagëve të marra.
Menjëherë pas këtij krimi të rëndë, policia ka nisur hetimet dhe ka ngritur postblloqe të shumta në veri të vendit, por pa dhënë detaje të mëtejshme mbi këtë ngjarje. Burimet policore thanë se në kuadër të kontrolleve të kryera janë shoqëruar disa persona në komisariatin e Malësisë së Madhe dhe të Shkodrës, por nuk janë dhënë detaje të mëtejshme. Policia tha se makina e viktimës nuk është lëvizur gjatë natës, por është marrë në ruajtje nga uniformat blu, pasi pritet të zbardhë ditë, me qëllim që të bëhet këqyrja e vendit të ngjarjes. Dyshimet e para të policisë janë për larje hesapesh. Gijotina.com
