Policia dhe ushtria kanë blinduar Rinasin në pritje të avionit të parë me shtetasit afganë, të cilët do të strehohen në vendin tonë për një afat të pacaktuar. Burime zyrtare pranë qeverisë deklaruan se avioni i parë me qytetarë nga Afganistani pritet të ulet në Rinas rreth orës 03.00 të mëngjesit të së premtes.
“Për arsye të sigurisë, nuk do të lejohen kamera në pistë, por planet do t’ju shpërndahen përmes një linku të posaçëm. Ndërkohë, kolegët e medias, do të lejohen të qëndrojnë në perimetrin e jashtëm të pistës ushtarake të aeroportit të Rinasit”, deklaruan burimet zyrtare.
Nga ana tjetër, policia dhe ushtria kanë marrë masa për krijimin e një perimetri sigurie në Rinas, ndërkohë që në ndihmë u kanë shkuar dhe dy ambulanca. Ambulancat janë stacionuar pranë kampit provizor të ngritur në Rinas, ku do të ushtrohen kontrollet mjekësore për shtetasit afganë, para se ata të dërgohen pranë qendrave të pritjes.
Burimet qeveritare thanë për Gijotina.com se në avionin që tashmë është nisur drejt Shqipërisë udhëtojnë rreth 170 afganë. Ndërkohë, Ministrja e Jashtme Olta Xhaçka dhe përfaqësues të ambasadës amerikane në Tiranë kanë mbërritur në Rinas për të pritur grupin e parë të afganëve që do të mbërrijnë në vendin tonë.
