Presidenti Ilir Meta ka përcjellë një mesazh ngushëllimi për ndarjen nga jeta të dirigjentit të njohur shkodran, Kujtim Alija.
Presidenti e cilëson Alijan si një personalitet të shquar të muzikës shqiptare, ndërsa shton se ishte një qytetar model i Shkodrës.
“I trishtë lajmi për ndarjen e parakohshme nga jeta të artistit të mirënjohur shkodran, Mjeshtrit të Madh Kujtim Alija, simbolit të Festivaleve të Këngës për Fëmijë.
Personalitet i shquar i muzikës shqiptare, dirigjent virtuoz, edukator energjik dhe mësues i palodhur i shumë gjeneratave me vlerat e artit dhe kulturës kombëtare, zbulues i talenteve të rralla që do shkëlqenin në skenat vendase dhe botërore, shembull i intelektualit dhe qytetar model të Shkodrës, humbja e tij le pas shumë dhembje.
Ngushëllime familjes, komunitetit të dashur shkodran, artistëve dhe bashkëpunëtorëve të shumtë.
Të prehet në paqen e merituar!”, shkruan Meta në Facebook.
Dirigjenti Kujtim Alija ka ndërruar jetë ditën e sotme nga një sëmundje e rëndë. Ai ka qenë organizator për shume vite i festivalit mbarëkombëtar të fëmijëve si dhe drejtues i qendre kulturore të fëmijëve në Shkodër, ndërsa mban titullin “Mjeshtër i Madh”.
