Kreu i PAA-së, Agron Duka iu është bashkuar reagimeve me rastin e 9 majit, Ditës së Europës.
Përmes një mesazhi, Duka thekson se politika ka përdorur integrimin në BE për luftë të brendshme partiake.
Sipas tij, Europa është krijuar nëpërmjet solidaritetit midis vendeve anëtare, vizion për të cilin ka nevojë sot më shumë se kurrë edhe politika shqiptare.
Mesazhi i plotë:
Boll jemi vetë-vonuar!
Boll e kemi përdorur integrimin në BE për luftë të brendshme partiake.
Ky prioritet strategjik i kombit shqiptar nuk i përket vetëm një individi apo partie dhe atë nuk mund ta përmbushë vetëm një individ apo parti.
Në fjalimin e tij historik një prej baballarëve themelues të BE-së, ish ministri i jashtëm francez Robert Schuman qartësoi në 9 Maj 1950 se Europa e Bashkuar nuk do të ndërtohet menjëherë, as sipas një plani të vetëm. Ajo do të ndërtohet nëpërmjet solidaritetit midis vendeve anëtare, solidaritet që duhet të krijohet nga sukseset.
Për këtë vizion ka nevojë sot më shumë se kurrë edhe politika shqiptare.
Gëzuar ditën e Europës së Bashkuar, këtij projekti vizionar dhe të suksesshëm që largoi konfliktet dhe luftrat dhe prodhoi paqe dhe mirëqenie mbi gërmadhat e nacionalizmave të sëmurë.
Agron Duka
Kryetari i PAA
