Sot u zhvillua seanca në Komisionin e Pavarur të Kualifikimit për prokurorin e Sarandës, Sali Hasa i arrestuar për korrupsion. Ky i fundit nëpërmjet një deklarate nga burgu nuk është paraqitur në proces ndërsa në mungesë ishin edhe pala mbrojtëse e prokurorit. Gjatë seancës KPK deklaroi se hetimi për Hasan është kryer vetëm për pasurinë. Poashtu raporti ILDKPKI ka rezultuar se deklarimi nuk është i saktë, ka deklarime të rremë dhe mungesë burimesh.
Për një pasuri tokë arë 500 metër katror, ka rezultuar se ka pasur deklarime të pasakta në vlerën e shitjes së kësaj prone. Ndërkohë ka rezultuar se në këtë pronë, ka ndërtuar edhe një objekt, por e padeklaruar.
Hetimet
Kujtojmë se referuar detajeve nga dosja hetimore, gjatë një kontrolli në banesën e Hasës, janë gjetur 11 milionë lekë të vjetra dhe një sasi prej 2 mijë eurosh, të cilat dyshohet se janë përfituar nga aferat me drejtësinë. Kjo vlerë parash në emër të prokurorit tashmë me vendim gjykate është vendosur në sekuestro preventive. Kujtojmë që Këshilli i Lartë i Prokurorisë vendosi me votë unanime pezullimin nga detyra të prokurorit të Sarandës.
Hasa u arrestua me urdhër të SPAK së bashku me pesë persona të tjerë. Pas shoqërimit të tij në komisariat, Hasa në masën e sigurisë “Arrest me burg” ka mohuar përfshirjen në korrupsion dhe shkeljen e ligjit. Emri i zyrtarit, doli pas hetimit nga ana e prokurorisë të nisur në shkurt të vitit të kaluar, ku një grup kriminal që trafikonte drogë, korruptonte edhe zyrtarë publikë. Prokurori akuzohet për veprën penale “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”.
Pas hetimeve të nisura gushtin e kaluar për një grup trafikantësh të lëndëve narkotike, ranë në përgjime oficeri i policisë Napolon Hodaj, një arbitër futbolli, drejtues i ekipit të futbollit në Përmet si dhe një ekspert mjeko-ligjor. Referuar hetimeve ka rezultuar se Hasa ka pushuar akuzën e plagosjes për E. M., pasi ka marrë një shumë parash nga motra e tij E. P., që po hetohet nën masën e arrestit shtëpiak. Pjesë e këtij grupi kriminal ka qenë edhe një ekspert mjeko-ligjor, i cili ka përpiluar një raport mjekësor fals, në favor të pushimit të procedimit penal marrë përsipër nga prokurori Hasa, ndaj të cilit është vendosur “Detyrim për t’u paraqitur në policinë gjyqësore”.
