Partia Komuniste në Kinë ka ndërhyrë në tekstet shkollore, ku ka përfshirë mendimet e presidentit Xi Jinping. Synimi është fuqizimi i kultit të presidentit te fëmijët dhe krijimi i një brezi të ri patriotësh. Ministria e Arsimit e Kinës ka thënë se do të përfshijë ideologjinë politike në planprogramin mësimor, nga shkollat fillore e deri tek nivelet e diplomimit.
Qeveria kineze tha se mësuesit e shkollave fillore duhet të “mbjellin farat e dashurisë për partinë, vendin dhe socializmin”. Sot, në ditën e parë të shkollës nxënësit pasi u ulën në banka shfletuan tekstet dhe u njohën me citatet e presidentit të shoqëruara me fotografitë e tij. Thëniet tregonin arritjet e qytetërimit kinez dhe rolin e Partisë Komuniste në zbutjen e varfërisë dhe luftimin e pandemisë së COVID-19.
“Gjyshi Xi Jinping është shumë i zënë me punë, por pavarësisht se sa i zënë është, ai prapë u bashkohet aktiviteteve tona dhe kujdeset për rritjen tonë”, thuhej në një libër shkollor.
Disa prindër u shprehën të shqetësuar në lidhje me këtë planprogram, por refuzuan të intervistoheshin nga AFP, nga frika se do të kishin probleme me autoritetet nëse flasin për mediat e huaja. Megjithatë, komentuesit anonim në rrjetet sociale e kanë kundërshtuar masën.
“Shpëlarja e trurit fillon që nga fëmijëria”, shkroi një përdorues i platformës së mediave sociale Weibo.
“A do të mund ta refuzojmë këtë?” pyeti një tjetër.
Një profesor i çështjeve ndërkombëtare në Georgia Tech Institute në SHBA , tha se duke marrë parasysh atë që ka ndodhur në katër dekadat e fundit “shumë prindër dhe studentë mund të mos e pëlqejnë këtë, por shumë pak prej tyre do të guxonin ta kundërshtonin publikisht”.
“Mbase shumica nuk do ta marrin shumë seriozisht”, tha ai.
