Mbrojtësi i Rajo Vajekanos, Ivan Balliu ndezi opinionin sportiv në vend teksa refuzoi ftesën e trajnerit Edi Reja. Në prononcimin e tij futbollisti theksoi se ky vendim është marrë për shkak të një dëmtimi.
“Vuaj nga disa shqetësime me pubalgjinë. Kam hasur probleme së fundmi dhe për këtë ju them që nuk jam mirë. Mund të them edhe jam i pafat.
Sapo erdhi ftesa nga Kombëtarja, unë nuk jam në gjendjen e duhur që t’i përgjigjem. Grumbullimi me Shqipërinë është shumë i rëndësishëm dhe do të doja shumë që të isha pjesë e saj, por për fatin tim të keq kjo nuk është e mundur.
Stafi mjekësor i klubit tim më ka thënë që këtë periudhë të ndeshjeve të Kombëtares është mirë që unë ta shfrytëzoj për terapi në mënyrë që të kem kohë të rikuperohem dhe të jem gati në vazhdimësi. Sipas tyre, nuk është mirë që unë të shkoj në grumbullim me Kombëtaren duke e pasur këtë shqetësim.
Kam disa ditë që më duhet të marr injeksione për dhimbjet. Kam luajtur me injeksione për ta përballuar atë ndeshje. E përsëris që Shqipëria është diçka e rëndësishme për mua.
Asnjë futbollist nuk është i lumtur në momentin kur Kombëtarja nuk e thërret. Mirë po, arsyeja pse unë tani nuk po shkoj në Kombëtare është se nuk duroj dot dhimbjet që kam. E ripërsëris edhe një herë që kam shumë dëshirë të luaj me Kombëtaren.
E kam ndjekur dhe ne jemi në një grup të vështirë. Të gjithë e dinë kur shohin kundërshtarët që kemi. Mirëpo, unë kam besim se Shqipëria do të luajë shanset e saj për Botërorin. Kam besim te kualifikimi!
