Tifozët e Lacios konfirmojnë sërish raportet e brishta që kanë me shqiptarët në skuadër. Pas ofendimeve ndaj Elseid Hysaj ku shkak u bë një këngë nacionaliste italiane, këtë herë ultrasit bardhekaltër kanë kërcënuar me jetë drejtorin sportiv të Lacios, Igli Tare. Lajmi është publikuar nga djali i tij, Etien Tare në rrjetet sociale.
“Duhet të vdesësh, ti e babai yt. Copa m… Jeni kanceri i Lacios. Ai babai yt i paaftë. Jeton akoma ai vdekësira, babai yt. Na e shpifni, si ti, ashtu edhe babai yt. Nëse nuk merrni as Zakanjin. Flini me një sy hapur se nëse e kap ndonjë lacial, do i fusë thikën”, ishte kërcënimi më i fundit që kishte marrë Etien Tare i cili i’u kundërpërgjigj në këtë mënyrë: “Jam lacial që kur jam fëmijë, festoj çdo herë që fiton Lacio, dëshpërohem kur humbasim. I vesh këto ngjyra me krenari dhe ndjenjën e përkatësisë.
Respektoj çdo lloj kritike, pasi liria e fjalës dhe e shprehjes janë gjërat më të bukura që ekzistojnë. Por mendoj se këtë herë është kaluar caku. Më vjen keq që lexoj disa fjalë, mund të mos jesh dakord me disa zgjedhje, por nuk duhet të mungojë respekti, KURRË. Ndaj meje, babait tim dhe familjes time”, ishin fjalët e Etien Tares.
