Komisioni i Pavarur i Kualifikimit (KPK) ka shkarkuar nga detyra prokurorin e Sarandës Sali Hasa, i arrestuar pas akuzave të SPAK për korrupsion.
Hetimi për prokurorin është kryer vetëm për pasurinë. Nga raporti ILDKPKI ka rezultuar se deklarimi nuk është i saktë, pasi ka deklarim të rremë dhe mungesë burimesh.
Hetimet
Emri i zyrtarit, doli pas hetimit nga ana e prokurorisë të nisura në shkurt të vitit të kaluar, ku një grup kriminal që trafikonte drogë korruptonte edhe zyrtarë publikë. Mes zyrtarëve të korruptuar rezultoi edhe prokurori Hasa, i cili nga sot është në pranga. Sakaq theksojmë sërish se personat e tjerë të arrestuar janë: Napolon Hodaj, Oficeri i Policisë Gjyqësore në Prokurorinë Pranë Gjykatës së Shkallës dhe 3 persona të tjerë. Hasa akuzohet për veprën penale “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”. Ndërsa, sipas burimeve nga GJKKO mësohet se arrestimi dhe hetimet ndaj prokurorit kanë lidhje dhe me ish-gjyqtaren e Krujës Enkeleida Hoxha, e cila prej muajsh është shkarkuar nga detyra dhe mbahet në masën e sigurisë “Arrest me burg”. Vetë Hoxha i ka mohuar vazhdimisht akuzat, ndërsa familja e saj pretendon që ajo ka qenë e ndikuar nga persona të tretë në dhënien e vendimeve. Megjithatë hetimet nga organi i posaçëm i akuzës SPAK kanë nxjerrë në përfundimin se avokatja ka ushtruar veprimtari në kundërshtim me ligjin, pasi ka mundësuar lirimin e parakohshëm të disa kriminelëve të dënuar me burgim të përjetshëm. Ndërsa, avokati i Hoxhës, Ardian Visha ka lajmëruar ankimin e vendimit. Në një deklaratë për mediat, pas dhënies së vendimit nga Këshilli i Lartë Gjyqësor, Visha tha se rasti “Billa” është ai që ka lënë pasoja, por që në këtë rast, gjyqtarja Hoxha ka pranuar gabimet.
