Detaje të reja kanë dalë në dritë nga atentati me armë zjarri që iu bë biznesmenit Edison Begajt në hyrje të shtëpisë mbrëmjen e 29 Majit në Kaninë të Vlorës. Errësira mund të ketë favorizuar autorin të largohet nga vendi i ngjarjes por vetëm kaq. Duket se provat e gjetura nga ekspertët hetimorë në makinë e kanë nxjerrë zbuluar të shpallurin në kërkim ndërkombëtar Mitri Prifti. Nga hetimet e kryera pas ngjarjes në periferi të Lushnjes, për shkak të shpejtësisë mjeti i Priftit doli nga rruga duke përfunduar në kanal. Brenda makinës, policia gjeti prova të mjaftueshme për të çuar në identifikimin e autorit të plagosjes së Begajt.
Një kapele e përdorur nga autori, fije floku, mbetje biologjike si dhe shenjat e gishtave, zbuluan se bëhej fjalë për 36-vjeçarin nga Tirana, Mitri Prifti.
Ai fillimisht u shpall në kërkim policor dhe me marrjen e përgjigjes së ADN-së për provat e siguruara në makinë, policia e shpalli në kërkim ndërkombëtar. Por rezultoi se një ditë pas ngjarjes, Prifti ishte larguar drejt Italisë në mënyrë të rregullt.
Atentati
Edison Begaj ka qenë në makinë me dy fëmijët e tij, rreth orës 23:00, më datë 29 maj 2021, kur teksa po hapte portën e banesës së tij, është qëlluar nga një person i maskuar dhe i veshur si polic. Autori, përkatësisht shtetasi M. P., 36 vjeç qëndronte në këmbë, i fshehur mes ullishteve të fshatit Kaninë, duke pritur 41-vjeçarin. Ndaj tij janë qëlluar 4 plumba, nga tre metra largësi, duke e lënë të plagosur. Më pas, 36-vjeçari është larguar po në këmbë nga vendngjarja dhe më pas, është marrë nga disa persona të tjerë në një makinë dhe është larguar. Begaj u dërgua në spital për të marrë trajtim mjekësor dhe kur u mor në pyetje, deklaroi se nuk e njihte autorin, për shkak të errësirës në zonë. Më vonë, u zbulua se personi që qëlloi 41-vjeçarin, ishte shtetasi M. P. Fillimisht, u dyshua për një prishje të pazareve të drogës, duke qenë se Edioson Begaj është një i emër i njohur për drejtësinë, pasi është kapur e dënuar disa herë për trafikim të drogës përgjatë viteve. Ishin pamjet filmike, të kamerave të sigurisë së lokalit, të cilat zbuluan konfliktin midis Begaj dhe 36-vjeçarit. Gjatë këtij debati, 41-vjeçari e ka goditur me shuplakë, por përsëri mbetet i paqartë motivi i sherrit në lokal.
