Maqedonia e Veriut duket se do t’i shtohet listës së vendeve që do të miratojë një dozë të tretë të vaksinës anti-Covid për qytetarët.
Ministri i Shëndetësisë, Venko Filipçe tha për mediat se autoritetet shëndetësore në vend kanë realizuar takim me përfaqësuesit e kompanisë Pfizer dhe se pritet që të rekomandohet aplikimi i dozës së tretë të vaksinës.
“Kemi pasur takim me ta javën e kaluar. Kemi parë informacionet e tyre rreth studimeve klinike për dozën e tretë. Pfizer është kompania më e avancuar në studimet klinike. Të gjitha studimet thonë me siguri do të ketë edhe dozë të tretë të vaksinës, por presim që këto të dhëna të zyrtarizohen”, tha Filipçe.
Ndër të tjera, ministri shtoi se vendi posedon mjaftueshëm vaksina ant-Covid, dhe se procesi nuk rrezikon ndërprerje.
“Kemi në dispozicion rreth 300 mijë doza. 115 mijë doza të vaksinës AstraZeneca, 110 mijë vaksina Pfizer dhe 100 mijë doza Sinovac. Kemi edhe sasinë në vazhdueshmëri që vjen 30 deri 40 mijë doza çdo të hënë ose të martë nga kompania Pfizer”, deklaroi ai.
