Komisioni i Prokurimit Publik ka shpallur të pavlefshëm tenderin për mirëmbajtjen e makinës së blinduar në pronësi të shtetit ku fitues ishte shpallur oferta më e lartë.
Ankesat e 2 kompanive të skualifikuara nga gara, kanë kërkuar rishikimin e vendimit për përjashtimin nga procesi. Për kontratën shfaqën interes 4 subjekte dhe fitues është përzgjedhur “Power Industries” me ofertën 3 milionë e 490 mijë lekë, vetëm 9700 lekë më pak se fondi limit i vendosur në dispozicion.
Pretendimet e dy kompanive që kishin paraqitur ofertë më të ulët nuk u morën në konsideratë nga autoriteti kontraktor i cili vazhdoi me procedurat, duke e çuar rastin në KPP.
Sipas vendimit të KPK, arsyeja e skualifikimit të tenderit është se kishte të bënte me plotësimin nga ana e operatorëve ekonomikë pjesëmarrës të skemës së montimit për pjesët e këmbimit, i cili është një kriter që nuk është përcaktuar qartë dhe saktë, ku për rrjedhojë ka sjellë konfuzion jo vetëm tek të gjithë operatorët ekonomikë pjesëmarrës, por edhe tek anëtarët e komisionit të vlerësimit të ofertave, gjatë procesit të shqyrtimit e të vlerësimit të ofertave në procedurën objekt-ankimi.
Si rrjedhojë Komisioni i Prokurimit Publik vendosi se për shkak të situatës konfuze të krijuar nga mos përcaktimi i qartë i kritereve të përzgjedhjes së fituesit, përbën shkak për anulimin pjesërisht të dokumenteve të tenderit të cilat përbëjnë gabime thelbësore, duke krijuar shkak për trajtim të pabarabartë dhe diskriminues për të gjithë operatorët ekonomikë si edhe konfuzion në rastin konkret për vetë autoritetin kontraktor dhe pozita të pabarabarta për vetë ankimuesit. Në këto kushte i është kërkuar Drejtorisë së Shërbimeve Qeveritare që të anulojë këtë procedurë dhe në rishpalljen e saj të ketë parasysh konstatimet e bëra.
