Banorët në zonën e Komunës së Parisit në Tiranë, prej disa ditësh janë pa ujë. Lajmin e bën ditur anëtari i kryesisë së Partisë Demokratike, Gert Bogdani, i cili thotë se është e papranueshme që një lagje e tërë e Tiranës të mos furnizohet me ujë!
Kjo situatë e përsëritur ndodh në një kohë që ujësjellësi i Bashkisë së Tiranës paguan miliona lekë për PR dhe nuk merr asnjë masë për furnizimin me ujë dhe për cilësinë e tij.
“Me lajmërojnë banorët se Komuna e Parisit ka disa ditë pa ujë! Është e papranueshme që një lagje e tërë e Tiranës të mos furnizohet me ujë! Ndërkohë që ujësjellësi i Bashkisë së Tiranës paguan miliona lekë për PR, jo vetëm që nuk merr asnjë masë për rritjen e cilësisë së ujit, që vazhdon të jetë i papijshëm, por për më tepër nuk garanton as furnizimin minimal të lagjeve të kryeqytetit!”, shkruan Bogdani.
Më tej, ai evidenton se ndër vite çmimi i ujit është rritur dhe pritet të katërfishohet pas një raporti të publikuar nga Enti Rregullator i Sektorit të Furnizimit me Ujë
dhe Largimit e Përpunimit të Ujërave të Ndotura.
Depozitat e ujit dhe pompat vazhdojnë të jenë pjesë e panoramës së qytetit dhe përditshmërisë së banorëve! Ndërkohë edhe pagesat shtesë për ta blerë ujin e pijshëm, rëndojnë në xhepat e familjeve të Tiranës.
Problemi i ujit të pijshëm ka qenë problem edhe në disa zona të tjera të Tiranës gjatë muajve të Verës. Një ndër premtimet e Ramës që në mandatin e parë është “ujë 24 orë në çdo shtëpi”, premtim ky që artikulua edhe në fushatën elektorale para zgjedhjeve të 25 prillit.
